Aruba a uni su mes na e ‘Declaracion di Lima’ tambe

Aspecto di Aviacion Civil

ORANJESTAD (AAN): Recientemente Aruba a uni su mes na e “Declaracion de Lima”, pa loke ta metanan strategico di aviacion civil, hunto cu 20 otro pais den nos region. Esaki a tuma luga durante e Asamblea Extraordinaria di Comision Latinoamericana de Aviacion Civil (CLAC) na Lima, Peru.

   E declaracion ta pone obhetivonan pa e paisnan pa e proximo añanan riba tereno di: (*) Desaroyo di transporte aereo pa nos region. (*) Accesibilidad di transporte aereo. (*) Promocion di aviacion sostenibel teniendo cuenta cu medio ambiente. (*) Promocion di desaroyo di cargo aereo den nos region.  (*) Promove un ambiente resiliente pa enfrenta crisisnan potencial.

  Tambe tin: (*) Mantene of eleva nivel di seguridad di aviacion (tanto ‘safety’ como ‘security’).  (*) Aplicacion di tecnologianan nobo pa facilita transporte aereo.  (*) Coordinacion entre autoridadnan di aviacion, ICAO y otro instancianan pa promove regulacionnan uniforme y harmonisa. (*) Promocion di participacion den actividadnan di aviacion door di hende muher.  (*) Training continuo di e comunidad di aviacion.  (*) Unidad den accion pa representacion den region di instancianan internacional.

   E industria di aviacion ta hunga un rol sumamente significante pa Aruba su economia. Tanto pa e parti turistico, como e parti di carga aereo. Pa e motibo ey, ta di importancia pa tin metanan strategico bon defini y pa traha en conhunto, considerando e retonan internacional pa e industria di aviacion. E retonan aki ta inclui, entre otro, pandemia, gueranan, instabilidad politico, gastonan halto pa haci negoshi y disrupcionnan den e cadenanan di suministro. E unico manera pa por logra e metanan menciona ta door di cooperacion. No solamente riba nivel local, pero tambe riba nivel internacional.

   Durante e Asamblea menciona, Aruba tambe a firma un MoU cu paisnan di region pa facilita asistencia cu tur tipo di aeronave den caso di un calamidad.

E “Declaración de Lima” lo bira e guia pa desaroyo di aviacion pa Aruba pa e proximo añanan. Directie Luchtvaart tin diferente programa di cooperacion implementa caba, tanto cu paisnan den Reino como otro paisnan den nos region. Awor lo sigui amplia e programa aki ainda mas.

    Cu esaki Ministerio di Transporte, y tambe Directie Luchtvaart Aruba, cu ta responsabel pa e maneho y strategia di aviacion civil na Aruba, lo duna un impulso nobo na e desaroyo di e industria di aviacion na Aruba.