Directiva nobo di KvK a bay papia cu Ministro encuanto asunto di Landspakket

ORANJESTAD (AAN): Manera DIARIO a trece dilanti recien, Camera di Comercio y Industria di Aruba a elegi un bestuur nobo pa e aña 2022,

di señora Mr. Monica Kock como presidente, sr. Gavril Mansur como vice-presidente y demas miembronan, señora  Wanda Broeksema, sr. Daniel Ferrara, sr. Gerardus (Geert) Weber, sr. Eugene Farro, sr. Diederik Kemmerling, señora Lay Hing de Kort-Yee y sr. Omar Tromp.

   Den e cuadro ey e bestuur nobo di Camera di Comercio a reuni cu Minister di Economia, Comunicacion y Desaroyo Sostenibel Mr. Geoffrey Wever riba varios tema di importancia pa economia di Aruba.

   Camera di Comercio a informa Minister Wever di kier ta envolvi cu e implementacion di e topiconan di Landspakket cu ta regarda comercio, manera e reforma fiscal, mehoracion di e “level playing field”, reforma di leynan laboral. Minister Wever a duna bestuur di Camera di Comercio un splicacion di e trabaonan cu ta den ehecucion relaciona cu e “economische hervormingen”.

   Pa locual ta trata e “economische hervormingen” tin 4 proyecto cu a worde aproba door di Ministerraad di Aruba cu a worde identifica como e puntonan mas importante y necesario pa por tin un base solido pa economia di Aruba, entre otro (i) e eliminacion di “red tape” y un “one stop shop” pa permiso relaciona cu negoshi, (ii) implementacion di e mededingingsautoriteit y (iii) apertura di banco na un forma mas acelera. Tur ta basa riba recomendacionnan di un consultancy firm Hulandes Economisch Bureau Amsterdam. Minister Wever a informa tambe cu den cuadro di transparencia e a solicita un reunion cu Parlamento di Aruba pa asina duna un presentacion di e 4 proyectonan aki pa asina Parlamento di Aruba ta na altura di e trabaonan cu ta den ehecucion.

   Minister Wever a splica bestuur di Camera di Comercio cu promer lo duna Parlamento di Aruba un splicacion amplio y duna Parlamento tur e consehonan cu a worde prepara pa Economisch Bureau Amsterdam y despues lo informa pueblo di Aruba tambe di esaki. Tambe Minister Wever a splica Camera di Comercio cu Minister di Economia ta trahando riba un programa di inversion pa proyectonan sostenibel pa asina crea oportunidadnan di inversion pa sector financiero y dunando un empuhe na economia di Aruba y na mes momento contribui na e transicion pa haci Aruba un pais sostenibel.

    Minister Wever ta gradici e bestuur di Camera di Comercio saliente pa e tremendo trabao cu nan a desplega y ta desea señora Mr. Monica Kock y e bestuur nobo hopi excito y ta spera cu Ministerio di Economia y Camera di Comercio sigui traha hunto na bienestar di economia di Aruba.