Na 2018 investigacionnan di DIARIO a expone e berdad mundial di awe --- *Mundo liber ta prepara pa e menasa di guera di doño di Citgo Putin --- *Aruba mester a bira centro di Nicolas Maduro como satelite di Rusia
ORANJESTAD (AAN) — Pa DIARIO por a kibra uno di e aventuranan mas grandi cu politica a yega di ofrece Aruba, DIARIO mester a percura pa bay te den fondo di e sucesonan cu a inicia for di momento cu Mike Eman como Prome Ministro a haya contacto cu e dictador comunista Venezolano, Nicolas Maduro.
Cuba, centro di operacion di Rusia den Caribe, a haya den e petroleo di Nicolas Maduro un sosten fuerte pa expansion di comunismo cu bou direccion di Vladimir Putin, a duna prueba cu e kier bolbe na e poderio di Union Sovietico ora na 2014 Crimea a wordo anexa na Rusia.
Hugo Chavez, sigui pa Nicolas Maduro a comberti Venezuela den un dictadura nobo guia pa Cuba y Rusia.
Ta cu un Venezuela, satelite di e poder Comunista mundial dirigi pa Rusia, Gobierno Mike Eman a bay firma un acuerdo cu a entrega economia di Aruba na Nicolas Maduro, cu a bende Venezuela cu e poder Ruso.
Chavez y Maduro a crea debenan grandi cu Rusia mester a financia, loke a haci cu e debenan cu Venezuela tabata crea, tabata hinca Venezuela mas y mas den man di Rusia.
DIARIO a rementa e gran berdad cu na momento cu Mike Eman como Prome Ministro di Aruba a firma un acuerdo cu Nicolas Maduro pa Venezuela haya e ruinanan di Lago pa bin habri un refineria, Mike Eman a entrega Aruba directamente na Rusia, cu ta uno di e doñonan real di Citgo.
49 porciento di Citgo te awe ta borg di Rusia, mientras cu otro companianan hunto cu tambe Nicolas Maduro debe placa, tin e resto (51 porciento) accionnan di Citgo, cu cualkier momento Rusia por cumpra.
DIARIO a presenta documentonan con hasta den Corte na Merca, ora mas compania cu Venezuela debe placa kier a confisca Citgo, Rusia a splica Corte Mericano cu e ta uno di e doñonan real di Citgo.
Na 2018 DIARIO a lanta para ora Aruba tabata wordo destrui dor di e incertidumbre cu tabata reina entorno e posibilidad cu Citgo por a cumpli cu su contracto cu Aruba.
Peor ainda, DIARIO a adverti pa e posicion peligroso di Aruba cu Maduro a comberti den su centro. Ora e Gerente di Citgo Astrubal Chavez a wordo forsa di bandona Merca, e kier a establece su mes na Aruba cu pa medio di Citgo por a wordo lastra y hiba den un conflicto mundial.
Na 2018, mayoria di mundo no tabata realisa e forma cu Vladimir Putin tabata trata na recrea e poder di Union Sovietico, e imperio crea pa e estadonan Sovietico cu dia 25 di December 1991 a stop di existi ora e bandera di e pais Rusia a subi na Kremlin pa reemplasa e bandera di Union Sovietico.
1991 a marca pues e derota di Union Sovietico cu tabata consisti di diferente pais manera Ucraina, cu awe Putin lo ta prepara pa invadi.
Un guera mundial ta e menasa actual mientras mundo liber ta cuminsa manda placa pa Ucraina por prepara su mes. Union Europeo a manda 1.2 Miljard Euro mientras tropanan Europeo ta mobilisa y Merca y Inglatera tambe a lanta para.
For di tempo di Chavez, Venezuela a bira un baluarte di Rusia. Venezuela no por wordo considera pais liber mas pero ta un satelite di Rusia, cu a arma Venezuela cu ta centro pa comunismo sigui plama den e region.
Na 2018, DIARIO a bati alarma pa e realidad cu presencia di Citgo na Aruba tabata haci Aruba participe di problemanan mundial.
Ora Guaido a lanta y a tuma poder di Citgo cu ta situa na Merca, DIARIO a mustra con ya Aruba tabata parti di un desaroyo peligroso cu a termina ora Prome Ministro Wever-Croes a pidi Grupo Guaido pa debolbe e yabinan di e refineria di Aruba.
Te awe Citgo ta wordo proteha dor di Merca cu no ta permiti Maduro saca placa di Citgo.
Den e situacion nobo, cualkier momento Citgo cu ta parcialmente propiedad legal di Rusia mientras Venezuela no paga e borg, por bira un centro di crisis internacional.
Mundo ta pendiente di loke lo pasa na Ucraina. Si Citgo como empresa Venezolano tabata na Aruba, awe Arubianonan mester a prepara den un situacion di emergencia pa Aruba, cu ya ta na peliger dor di cercania di Nicolas Maduro, cu semper a pensa cu Aruba ta propiedad di Venezuela, cu awe ta propiedad di Rusia!
