WILLEMSTAD: E informe a drenta prome na Rescue and Coordination Center di Guardacosta di Caribe Hulandes, procedente di Toren di Waf di Curacao Port Authority.
Mainta nan a haya informacion di e Capitan di e crusero Norwegian Pearl cu ta ancra pa basta tempo caba na e Megapier di e isla, cu un boto chikito a sink hopi cerca di nan crusero. E capitan no a duna ningun declaracion kico lo a pasa cu esnan cu tabata abordo.
E ora ta RCC mes a drenta den contacto directo cu e capitan di Norwegian Pearl pa haya mas informacion di loke a socede.
E Capitan di e crusero a declara cu un boto a sink hopi cerca di e barco crusero, y cu dos homber cu algun hemchi a landa direccion di e area Koredor, unda tin algun hut di piscado.
A base di esey, un boto di patruya di Guardacosta di Caribe Hulandes a mobiliza rapidamente na area di Koredor pa check si por localiza e dos tripulantenan.
E personal di Guardacosta cu a yega eynan, a topa na caminda un boto piscador cu tabatin e dos personanan tambe abordo. E dos hombernan aki a declara cu nan tabata piscando ora cu nan boto a bolter debi na un ola, y mesora a cuminsa sink. Nan tabatin lifevest bisti, y a landa rapidamente direccion e area di Koredor pa pidi yudanza pa saca nan boto. Pero ora cu nan a regresaabek na e lugar, nan boto a desaparece den profundidad.
E dos personanan aki tabata den bon estado di salud, y abordo di e boto ey mes nan a regresa pa e area di Koredor.
