Gregory Fung-A-Fat:
ORANJESTAD (AAN) – Gregory Fung-A-Fat a agrega, den entrevista cu DIARIO, cu mirando cu tin hopi cos pasando rond di mundo, lamentablemente Aruba a stagna.
Despues cu el a bin bek di Hulanda, el a haci un peticion na Parlamento pa puntra nan, eigenlijk den kico nan por yuda, pa pusha e desaroyo di agricultura na Aruba.
“Pasobra nos a sinta na Maart di e aña aki, y tur hende cu ta sinta den Parlamento a bay di acuerdo cu nos tin cu cuminza move. Y awo nos ta na November y e mesun contesta a keda pero nos no a bay dilanti ni a bay patras. Pero durante e reunion aki e punto di salida tabata kico nos ta bay haci cu BBO na frontera. Pasobra e ta toca nos. E ta 7% y na fin di dia e ta algo fastioso y mi a toca tur porta, tur minister, tur hende prome cu el a bay na vigor, pero eigenlijk te aworaki nada a pasa”, Fung-A-Fat a subraya.
El a agrega cu e ta bay bek Parlamento pa wak kico nan por haci. Pasobra si algo chikito asina nan no ta haya apoyo, anto kico nan ta papiando di dje? Gregory Fung-A-Fat ta cuestiona.
“Nan ta tuma nos na serio? Esey tabata eigenlijk e combersacion cu nos tabata tin cu nan. El a cuminza na BBO na grens, pero despues a toca otro puntonan tambe, cu nos a trece na mesa prome, pero te ainda nos ta na mesun lugar cu nos tabata para anteriormente”, Gregory Fung-A-Fat a indica.
“Ora di papia di bay un stap dilanti, Aruba en general a bay un tiki dilanti, pero esey ta debi na inversionistanan priva, pero ora di wak e infrastructura, e cosnan cu ta esencial pa e pilar aki lanta cabes? No!” Fung-A-Fat a expresa.
Fung-A-Fat a expresa cu tin mucho burocracia, y tin cu papia cu tur minister pa algo cu e ta puntra di con no tin un punto pa papia? “Ami tin cu yama cada minister individualmente pa toca e tema. Mi ta kere lo ta mas esencial y mas eficiente si tin un minister cu esaki ta su pakete y e tin cu solucion’e. P’esey ministernan tey, pa soluciona problema cu e veld tin. Y si nos tin cu bay cana cada Minister apart, e ta tuma hopi tempo y bo ta wak cu tur hende ta traha riba un isla. Ningun hende tin comunicacion entre nan”, Gregory Fung-A-Fat di United Farmers a remarca.
No obstante, Fung-A-Fat a bisa cu den e ultimo reunion cu nan tabata tin tabata tin tres punto importante: 1. Cu enberdad gobierno tin agricultura como un prioridad, pero United Farmers kier un contesta fiho. 2. Ken ta e minister cu nan tin cu sinta cu ne pa haci cierto palabracionnan y haci.
“Pasobra enberdad nos ta sinta papia cu ministernan haci varios cos, manera un MoU cu te awor no a haya acogida. Kico nos ta bezig cu ne? Ta pedida di tempo di nos y di e minister” el a conclui.
