Develo di Escudo di Pais Aruba na Bestuurskantoor

ORANJESTAD (AAN): Prome di januari atardi, na Bestuurskantoor, a tuma luga e develacion oficial di e escudo di pais Aruba,

un acto solemne cu a reuni simbolismo, historia y identidad nacional. E momento ta forma parti di e celebracionnan relaciona cu Status Aparte y e desaroyo institucional di Parlamento di Aruba, y a sirbi como un recordatorio poderoso di e balornan riba cual nos pais ta traha.

Vice-prome minister di Pais Aruba mr. Gerlien Croes durante su discurso a enfatisa riba e responsabilidad grandi cu henter Gabinete AVP-Futuro tin pa 2026 y cu tin cu laga cada logro historico te cu awo, guia cada minister den tuma decisionnan corecto pa pais y su futuro. Den union semper nos lo logra.

E develacion a tuma lugar den un ambiente di reflexion y respet, den un edificio cu ta representa gobernacion y continuidad di estado. E escudo di pais Aruba, como simbolo nacional, ta refleha e identidad, fortalesa y aspiracionnan di pueblo Arubiano, y ta para como un señal visible di autonomia, dignidad y responsabilidad colectivo.

E celebracion di e escudo ta conecta directamente cu e historia di Aruba como pais autonomo dentro di Reino, y cu e caminda cu a yega na Status Aparte. Simbolonan nacional manera e escudo, himno y bandera no solamente ta representa pasado, pero tambe ta sirbi como guia pa e decisionnan di awe y pa e futuro di pais, ta locual cu Prome Minister di Aruba mr. Mike Eman a comparti durante su discurso durante ceremonia.

Durante e acto, a tuma momento pa honra e legado di e prome prome minister di pais Aruba Henny Eman, un di e pioneronan di Status Aparte y un lider historico cu a haci contribucionnan duradero na formacion di Aruba como pais. Su vision riba autonomia, responsabilidad y bienestar pa tur ciudadano ta sigui forma parti di e fundeshi moral di nos institucionnan.

E ceremonia di develacion di e escudo di pais Aruba ta simbolo di continuidad: un brug entre pasado, presente y futuro. Den un periodo caminda Aruba ta prepara pa celebra 40 aña di Status Aparte y 50 aña di Himno y Bandera, e acto aki a reafirma e compromiso cu nos pais tin cu su identidad, su pueblo y e principio di Bon Comun.

Cu orguyo nacional y respet pa historia, e Escudo di Pais Aruba ta keda como un señal duradero di union, perseverancia y speransa pa e generacionnan presente y futuro.