Cancion lanza pa banda ‘activemirror’ na honor di cancion ‘Scochi Bo Mama’ di Vicente Kelly

ORANJESTAD (AAN): E banda alternativo di Aruba, “activemirror”, a caba di lanza un grabacion nobo yama ‘Scochi Bo Mama”,

cu ta e tan stima clasico folclorico componi door di Vicente Kelly.  E cancion a wordo graba y lanza cu e aprobacion di famia Kelly y viuda Elvia Kelly, y awor ya ta disponibel rond mundo riba tur plataforma di streaming.

   Skirbi y canta originalmente door di Vicente Kelly, “Scochi Bo Mama” ta pone contraste riba e inocencia sin preocupacion di infancia, cu awor trabao, belasting, y e preocupacionnan di bida adulto, mientras cu ta sigui anhela pa e comfort di cuido di un mama, e version di activemirror ta mantene e esencia di e cancion, pero ta duna un toke di punk cu ne.

   E cantante principal Liam Sean Kelly a declara: “Mi ta kere cu semper mi tabata kier a graba e cancion aki.  Nos guitarista Me’Shaq Richardson, y ami a graba un version na 2023, pero nos no tabata sigur kico nos lo bay haci cu ne.  Nos a acerca e cancion aki comosifuera e grupo ‘Sex Pistols’ ta cubri e cancion ‘My Way’ di Frank Sinatra”.

   “E momento ey, nos tabata puntra nos mes si tabatin sentido cu nos ta traha riba un cancion gusta pa pueblo, principalmente ora cu nos tabata ainda ta explorando nos relacion cu e escena musical local.  Tambe e ta un forma di mustra con musica por wordo interpreta di multiple forma, esta cu cancionnan por cobra bida nobo sin perde su origen,” segun Liam a bisa.

   E single a wordo graba, mezcla, y masteriza pa Kevin N. da Silva, kende tambe a produci e lanzamento hunto cu Kelly.  E cancion a wordo graba na e establecimento di Alfie’s na Oranjestad, cu ta e cas creativo di hopi tempo pa e banda musical aki.

   E lanzamento a wordo acompaña pa un videoclip, dirigi y produci pa Jason Yarzagaray di NPC Productions.  Por mira e videoclip na:

www.bit.ly/scochi

   activemirror ta un banda alternativo y post-punk di cual nan musica ta explora memoria, identidad y lugar via di skirbimento atmosferico di cancion, y presentacion en bibo hopi inmersivo.  E banda ta representa Aruba riba stage internacional, mientras nan ta sigui contribui na e comunidad original di musica cu ta sigui crece riba e isla.