Despues di 8 luna e Loranan ta prosperando pero nan mester di yudansa di comunidad

Nan a wordo mira den areanan residencial

ORANJESTAD (AAN): Manera por corda, tabata como 8 luna pasa a reintroduci e Yellow-Shouldered Amazon, miho conoci como e Lora, den Aruba su naturalesa.

   Aruba Conservation Foundation (antes “Parke Nacional Aruba”) ta contento di por comparti cu no solamente nan a sobrevivi e periodo di secura, pero nan a prospera tambe. Nan a cuminsa di explora areanan urbanisa, cual ta tremendo, pero ta trece retonan nobo. Retonan cu solamente humanonan por controla.

   Ta den man di comunidad pa sigura e exito di e programa di reintroduccion di e Lora. Por fabor sigui e siguiente guianan efectivo pa sigura e sobrevivencia di e Lora:

   (1) Tene bo distancia y no interactua cu nan.

   (2) Respeta nan, y mantene bo distancia pa nan por sigui desaroya nan comportacion natural.

   (3) No cria ni purba captura nan.  Esaki lo viola e ley cu ta proteha nan.

   (4) Mantene bo mascotanan manera pushi y cacho na un distancia pa coopera cu e Lora su seguridad.

   Si abo topa cu un Lora cu ta marca cu un of dos renchi (di color) na nan pia, raporta esaki via WhatsApp cu e dia/tempo, localidad, cantidad di Lora y potret na ACF su Wildlife Hotline via WhatsApp na (+297) 592-4476 of manda un email na: عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

   Hunto nos por tuma accion pa segura e protecion y preservacion di nos parhanan nativo pa futuro generacionnan por goza di dje.  E potretnan aki pa cortesia di Aruba Conservation Foundation.