Ademas di duna show riba escenario
ORANJESTAD (AAN): Manera cu DIARIO a trece dilanti caba, Diahuebs awor e conocido Rasti Rostelli despues di un pausa di 15 aña, lo tey bek den Cas di Cultura pa duna un show nobo di hipnosis y telepatia. E bon di e show aki, segun Rostelli, ta cu publico lo bay haya un yudansa pa stop cualkier asunto di mal costumber, of adiccion di cierto tipo cu pa personanan ta dificil pa stop di haci esaki.
El a confirma cu e show ta pa yuda esnan na Aruba, cu kier haya yudansa pa nan stop di huma, pa esnan cu kier yudansa pa stop di ‘come huña’, of kier yudansa pa baha peso, y mehora nan auto-estima. Tur esaki por wordo haci e anochi aki.
Rasti Rostelli ta biba na Alemania, y regularmente ta duna show na Hulanda y na Belgica. Ademas di e shownan aki, e ta ofrece sesionnan priva tambe pa personanan cu kier haya mihor yudansa pa stop cu nan mal costumber, di e.o. humamento, di come mangel, pa yuda baha peso, stop di come huña, y stop di bebe.
El a indica cu e sesionan priva ta hasta yuda pa hendenan reduci stress, reduci temor di haci examen, pa yuda soluciona problemanan familiar, y via di hipnosis por yuda hende stop di uso di droga. Tambe cu hipnosis por yuda un ser humano recupera mihor den temporada di rouw.
Rasti Rostelli ta duna sesion priva pa yuda hendenan cu miedo di cana riba caya, miedo di contacto social, di autoestima, inseguridad, stress di trabao, y hasta miedo di core tras di stuur.
El a indica cu na diferente ocasion e sa haci sesion priva pa companianan tambe, pa yuda tur empleado keda den mesun patronchi pa bay dilanti, y haya extra motivacion, y mas.
Extra atraccion: Segun Rasti Rostelli, e lo trece e biaha aki tambe un conocido Mentalista, esta George Elman kende ta bay riba escenario pa fascina publico cu su forma unico di lesa bo mente, haci algo cu cambio di pensamento, y señalnan inespera. E tambe ta haciendo show pa hopi aña, y awor e hypnotherapeut aki a uni cu Rasti Rostelli pa un extra bonus durante e show na Aruba. Tur esaki pa suministra publico un anochi di entretenimento y gozo.
Rasti Rostelli mes durante e show lo bay demostra tur loke ta posibel pa haci durante hipnosis. Cualkier persona por subi escenario y experiencia e parti di hipnosis aki. Bao guia di musica di meditacion, e boluntarionan lo keda mira un vlam, y drenta un trans profundo, y nan lo spierta bek solamente ora e supla den nan wowo.
Tambe e lo laga e personanan aki come un lamunchi completo, pensando cu ta un peach delicioso e ta. Su show di Diahuebs awor lo start pa 8:00 pm.
