Denuncia oficial cu hende a kibra 19 di e luznan aki di Linear Park na Malmok

ORANJESTAD (AAN): Dialuna banda di 2:50 pm, a presenta na Warda di Strandpolitie na Palm Beach, e ciudadano di inicial A., relaciona cu destruccion cometi door di hendenan baldadi.

    El a declara cu e presidente di “Tourism Product Enhancement Fund” y e ta responsabel  pa tey ora ta worde haci denuncia pa ora ta trata destruccion di facilidadnan publico y di turismo.

    E ciudadano A. a bisa cu relaciona cu e proyecto di Linear Park di Palm Beach pa Malmok, unda ta instala luznan chikito pa ilumina e looppad pa hende cana.  Ta trata aki di lampinan hinca tanto den beton como tambe den plastico.

    Segun A., e ta e persona di contacto si tin algun particularidad cu e proyecto di Linear Park di Boulevard pa Malmokweg, ya cu e tin algo di haber cu e aspectonan financiero di e proyecto.

   El a bisa cu Diabierna 4 di Maart el a mira cu e luznan aki ainda ta intacto.  Pero Diahuebs 10 di Maart den oranan di mainta el a bay cana riba e Linear Park, y a bin nota cu tin 19 luz cu a wordo destrui door di hendenan desconoci.

   El a mira cu e luznan aki a wordo destrui intencionalmente, y pesey el a dicidi na entrega keho na Polis.

   Polis a tuma keho, y sigur ta lamenta cu hendenan cu mente anti-social ta comete e acto aki.  Sinembargo e momento a yega pa actua!  Si acaso abo a mira, of bo sa kende lo a comete e acto aki di baha su furia riba un total di 19 instalacion di luz, pa yama Tipline di Polis na 111-41 pa asina yuda autoridad gara e personanan aki, y forzosamente e tin di bay paga pa drecha tur esaki.

   Si acaso e anti-social ta un menor di edad, e ora ta su mayornan lo tin di bay paga pa esaki.

   Como cu e Linear Park di Malmok ta hopi cerca di lama, aki no por pone palo di luz halto.  Pesey tin di pone luznan chikito, y ta parce cu hendenan anti-social ta djis scop y kibra nan.

   Un suplica ta bay na ciudadanonan bibando eybanda, pa nan revisa nan Security Video Camera tambe pa asina yuda cu e captura di e individuo(nan) aki.