ORANJESTAD (AAN): Diabierna mainta pa 7:55 am, yamada a drenta na Polis cu hendenan ta mira un homber drumi banda di caminda, na altura di Santana Catolico na Zeewijk.
Mesora Central a manda un unidad di Polis di San Nicolas na e lugar pa check kico ta pasando.
Ora cu e agentenan a yega na e area di Santana, di berdad a bin topa cu un homber di edad grandi, abao benta y e no ta duna señal di bida.
E Polisnan mesora a duna e informacion aki na Central, y pidi nan pa notifica demas autoridad, y tambe yama un Docter. Esaki a pone cu mesora a dirigi unidad di Recherche, y a cuminza busca un Docter.
Dr. Texier a yega na e lugar na Zeewijk, y pa 8:55 am a constata morto di e hende homber di inicial A. Autoridad no a suministra edad di e persona aki.
Vocero Liliana Rasmijn di Polis, a indica cu e caso ta bao investigacion pa saca afo kico por ta e causa di e morto. Fiscal a ser notifica, y el a duna ordo pa confisca e curpa pa mas investigacion, y posiblemente practica autopsia riba dje.
Na famia di e fayecido, DIARIO y Cuerpo Policial ta manda su mas profundo palabra di condolencia.
