Competencia di saca potret di bo klas na blauw special di ‘Un soño pa Aruba’

Un evento pa mucha- y hobennan

ORANJESTAD (AAN): Fundacion Respeta Mi ta conoci den comunidad pa traha riba e prevencion contra abuso y negligencia di mucha y hoben desde aña 1991.

   Recientemente Fundacion Respeta Mi tin dos studiante di Universidad di Aruba den segundo aña cu ta studiando Social Work & Development na Universidad di Aruba y nan ta haciendo nan pasadia (stage) na e fundacion. Marceylaine Paskel y Miguel Aceros conhunto cu Fundacion Respeta Mi ta lansa nan proyecto “Un Soño pa Aruba”.

   DIARIO a compronde cu e evento aki ta destina pa e muchanan y hobennan hunto cu nan docente uza nan creatividad pa lanta nan bos contra abuso y negligencia contra mucha y hoben.

   Un Soño pa Aruba lo tuma luga riba Diabierna 21 di April 2023, unda cu e scolnan por participa.

   Riba Dialuna 24 di April 2023 nan lo saca e ganador riba e red social di Facebook.

   Con pa participa: Saca un potret cu bo klas bisti na blauw uzando bo creatividad y treciendo e mensahe pa kico proteccion di mucha y hoben ta importante pa boso klas. Manda e potret via Whatsapp na 564-0270 pa Fundacion Respeta Mi.

   Fundacion Respeta Mi lo pone e potretnan aki riba red social di Facebook pa e comunidad di Aruba por like, share and react. Lo tin 3 premio pa e 3 potretnan cu mas like and reaction.

   E premionan: E prome premio: Klas lo bay cinema na Gloria Entertainment y nan lo haya popcorn cu refresco. E segundo premio: Klas lo bay Philips Animal Garden y nan lo haya ice cream di Pico Bello. E di tres premio: Klas lo haya un treat di Subway.

   Agradecimento: E organizadornan kier agradeci nan patrocinadornan pa cu e proyecto aki. Alaves nos ta encurasha e docentenan di Aruba pa hunto cu e muchanan pa lanta nan voz contra abuso y negligencia di mucha/hoben.