Prome Minister Wever-Croes: --- *E no sa esnan cu ta cuestiona di ki planeta ta bin!
ORANJESTAD (AAN) – Prome Minister mr. Evelyn Wever-Croes, dirigiendo su mes na Presidente di Parlamento mr. Edgard Vrolijk, a señala cu hopi Parlamentario, atravez di oposicion, a comenta cu gobierno lo a aumenta e cantidad di ministernan.
E dignatario a expresa cu e no sa den cual planeta nan tabata biba pa bisa algo asina. E mandatario a acentua cu Gabinete Wever-Croes ta bin di un gobierno di ocho minister, y keda un gobierno di ocho minister; kiermen, ta bin di un gobierno di ocho ministerio y ta di ocho ministerio, y esaki ta para den tur documento conoci pa Parlamento.
“Cu na October di aña 2020, cu un minister a wordo retira di su trabao door di Ministerraad, door di Gobernador, door di Parlamento, a haci cu mi a tuma e trabao ey over, temporalmente, no kiermen cu nos no a bay tampoco na ocho ministerio. Nos a keda cu ocho ministerio, pasobra e tabata algo temporal na e momentonan ey, despues cu gobierno a cay y a dura te ora a bin un gobierno nobo”, Prome Minister a indica.
E mandatario a agrega cu, por cierto, e tabata un cartera hopi complica y hopi pisa, y a reitera cu gobierno no a aumenta su cantidad di ministernan, pero ainda mas, nan a mantene esaki, apesar cu e trabaonan ta hopi mas pisa y hopi mas grandi aworaki.
