ORANJESTAD (AAN): E siman aki a sali publica un blog den e corant hulandes De Volkskrant, di un medico cu a duna su experiencia trahando cu pacient aki na Aruba.
E medico a comenta di por nota e problema di obesidad cu tin na Aruba y cu gobierno su plan di prevencion pa cu esaki.
Mirando cu e causanan di obesidad ta multiple y cu tin cu combati esaki for di diferente angulo, Minister di Turismo y Salud Publico Dangui Oduber conhunto cu Departamento di Salud Publico tin diferente plan coordina cu expertonan den e area por ehempel e NCD (non-communicable diseases) stuurgroep.
Un di e programanan di intervencion lo tin e meta netamente pa asisti personanan cu tin riesgo halto di malesa cronico a causa di sobrepeso y obesidad y pa preveni esaki.
Den otro area di prevencion, actualmente Departamento di Salud Publico conhuntamente cu Ministerio di Salud Publico, tin planes cu ta encera otro campañanan di informacion y programanan dedica na movecion y nutricion saludabel den colaboracion cu IBiSA.
Ta trahando tambe riba un clinica di prevencion cu e meta pa asisti esnan cu problema di sobrepeso pa hiba un bida mas saludabel. E clinica aki ta parti di un campaña integral dirigi ariba plannan nacional di prevencion di NCDs cu ta inclui obesitas, na unda lo enfoca ariba movecion y nutricion saludabel.
Y asina tin diferente proyectonan mas na caminda of den ehecucion cu ta sali for di Plan Nacional di Prevencion cu a inicia na 2020 y ta keda vigente te cu 2030.
E docter por a opta pa na hopi otro manera vocifera su preucapacion referente e tema respetando tur hende cu tin problema cu sobrepeso.
Aruba ta un comunidad chikito cu un cultura rico na tradicion vooral den area di cuminda. E cambio cu Minister di Salud kier trece ta pa respeta e cultura Arubiano pero reinforsa e parti di educacion y informacion riba tereno di salud (cu enfoke ariba nutricion y movecion) duna na e comunidad. E vision di Minister Dangui Oduber ta pa informa, educa y asina empodera e comunidad pa asina por haci un escogencia saludable y bon balansa.
