ORANJESTAD (AAN) – Eduard Pieters, di Fundacion Lanta Papiamento, a elabora tocante e reunion cu Formador Evelyn Wever-Croes, den cuadro di Formacion di Gobierno.
E reunion cu e fundacion a bay hopi bon, den bon esfera y señor Pieters a expresa su gradicimento cu e invitacion cu nan a haya di Formador, y na unda nan a trece dilanti hopi punto masha importante, pa loke ta trata e futuro di Aruba y muy specialmente e desaroyo di nos Lenga Materno Papiamento, y tambe di Enseñanza.
E fundacion a presenta na Formador, un documento completo unda nan ta basa nan mes riba diferente estudio cu a worde haci tanto local como internacionalmente, anto a base di esaki nan a traduci'e den un sistema pragmatico, pa e proximo gobernacion por ehecut'e pa e periodo 2021-2025, señor Pieters a splica.
“Nos di Fundacion Lanta Papiamento ta para, bringa y lucha pa un miho status di Papiamento den comunidad nacional pero tambe internacionalmente, y nos ta bringando fuerte hunto cu nos Islanan ruman Curacao y Bonaire, y algun organizacion na Hulanda, pa mehora status di Papiamento tanto na nos Islanan, pero tambe den Reino Hulandes”, Pieters a señala.
El a sigui bisa cu pa esaki e fundacion a presenta diferente punto, unda cu ta hopi importante pa Aruba institui su Instituto Linguistico Nacional, pa por traha riba un forma hopi structural y coherente, na un forma duradero riba e desaroyo di Papiamento, cu ta nos idioma nacional, pero tambe teniendo cuenta cu e otro idiomanan cu ta biba na Aruba.
El a agrega cu den e reunion e fundacion a bay riba e Plan Educacion Nacional 2030, cu ta un refleho di innovacion cu mester a sosode for di hopi aña caba.
“Aruba su enseñanza ta mas cu cien aña paraliza, atrasa, den hopi sentido. Anto, loke awe nos a trece padilanti ta puntonan pragmatico unda cu Minister di Enseñanza, den e caso aki, of Minister di Asunto General, por implementa pa mehora enseñanza pero tambe e status di Papiamento na Aruba” Pieters a reitera.
El a añadi cu nan a papia riba dos nivel durante e reunion cu Formador: Desaroyo di Papiamento den un Sociedad Multilingual y tambe riba e parti di Enseñanza, cu ta importante pa e durabilidad di idioma materno, esta Papiamento.
“Papiamento ta un idioma unda bo tin diferente variante den dje. Na Curacao nan ta papi’e di un otro forma pero e ta bin back na mesun cosnan. Por ehemplo, cierto conceptonan ta keda igual. Loke si ta hopi importante pa nos haci ta, ban traha prome riba status, laga nos tur hende cu ta biba na Aruba, respeta nos Idioma, papi’e adecuadamente, para tras di dje. Pa e drenta den enseñanza tur esaki ta hopi importante”, Eduard Pieters a subraya.
Tambe den e reunion a referi na haci Papiamento oficial na scol. “Nos ta para na un cruzada cu ta hopi importante pa nos tuma e decision aki. Pasobra si nos no tume aworaki nos ta bay tin problema aki un par di aña”, Pieters a señala.
