ORANJESTAD (AAN): E prijs promedio di gasolin na benta pa publico na Merca a cay bao di $4 pa galon riba Diahuebs,
y esey a socede pa prome biaha den varios luna, dunando asina alivio na chauffeurnan na e pais cu ta usa mas hopi gasolin na mundo.
E prijs promedio nacional pa Unleaded Gasolin a cay te na $3,999 pa galon riba Diahuebs, segun American Automobile Association.
Por corda con na luna di Juni, prijs di gasolin a yega te hasta un promedio di $5,02 y esaki a cay duro riba chauffeurnan y pesey nan a cumpra menos combustible durante luna di Juli, compara cu loke nan a cumpra durante e pandemia di Juli 2020. E reduccion nobo aki di prijs kizas por yuda President Joe Biden su gobierno y Democratanan den e eleccion di November venidero.
Washington a tuma hopi paso pa mantene prijs di combustible abao despues cu Rusia a invadi Ucrania. President di Merca a bisa cu inflacion a cuminza mustra señal di ta moderando, aunke hendenan keto bay ta keha con tur cos a bira caro. Tin di corda cu dado momento, prijs pa bari di crudo a hasta yega $139. E siman aki e tabata na $98.
