ORANJESTAD (AAN): E estudio di Bachelor Nederlands als Vreemde Taal ta un estudio pa bira docente di segundo grado (tweedegraads) di Hulandes.
Cu e estudio aki bo por duna les di Hulandes na alumnonan di EPB, EPI, mavo y e prome tres añanan di HAVO Y VWO. E estudio tin un duracion di cuater aña y ta adapta na e region di Caribe Hulandes.
E estudio ta prepara bo pa uza e formanan mas nobo pa duna les di Hulandes, teniendo cuenta cu e idioma Hulandes ta un idioma stranhero pa mayoria di nos alumnonan aki na Aruba. Alabes bo ta siña guia e alumnonan di scol secundario pa nan por siña tanto e idioma mes, como e aspectonan cultural di e idioma Hulandes.
Pa informacion mas amplio di e estudio bay na nos website www.ipaaruba.com, scoge ‘Initiele
Opleidingen’ sigui pa ‘opleidingen’ y despues pa ‘Bachelor Nederlands als Vreemde Taal’. Aki bo lo haya entre otro informacion tocante contenido di e estudio, rekisito pa por haci e estudio y gasto di e estudio.
Inscripcion pa aña academico 2022-2023 ta tuma luga online. Solamente studiante cu tin diploma di sea HAVO, VWO of MBO/EPI nivel 4 of cu ta den examenklas di un di e scolnan menciona por inscribi. Inscripcion pa e 21+Toets a cera dia 12 di november 2021, dus no ta posibel mas pa inscribi pa 21+ Toets pa aña academico 2022-2023.
E ultimo dia pa inscribi ta 18 di februari 2022 pa motibo cu e trayecto preparatorio pa yuda bo pasa e test cu bo lo mester cumpli cu ne, lo cuminsa. Despues di e fecha aki no por inscribi mas pa aña academico 2022-2023.
