AZV y SVb a reuni cu Formador - * Diferente recomendacion a bin dilanti
ORANJESTAD (AAN): Organo Ehecutivo di AZV como Banco di Seguro Social (SVb) a tene nan reunion cu Formador Evelyn Wever-Croes relaciona cu e formacion di Gabinete Wever-Croes 2.
Durante un conferencia di prensa, director di SVb, Edwin Jacobs a duna di conoce cu nan a haya un presentacion di e puntonan cu nan ta kere ta necesario pa haya atencion den e proceso di formacion di un gobierno nobo.
AZV y SVb a duna informacion riba e dos desaroyonan grandi cu tin pa loke ta e casonan den e sistema di seguridad social cu ta envehecimento y malesanan cronico. Tambe nan a duna indicacion di kico por spera pa e dos seguronan mas importante den e sistema di seguridad social cu ta e fondo di pension di vehez y tambe e fondo general di gastonan di malesa, Jacobs a splica.
A mustra cu manera e situacion ta aworaki si bo bin cambio e fondo di AOV su reservanan lo ta bay ta agotando den e añanan 2028 - 2029. Si no bin ningun cambio den AZV, segun e raport di PWC, pa añanan 2030-2035 lo surpasa 700 cu 800 miyon florin na gastonan medico.
Edwin Jacobs a laga sa cu nan a mustra kico e impacto ta riba e presion di gastonan colectivo den GDP. E problema di AZV ta pasa di 7,6 % na 2019 y yega te na un 12,3 % di GDP na 2035, impulsando e presion colectivo di gastonan di 40 % pa 45 %.
A bisa cu e pregunta ta si e instancianan internacional cu ta evalua regularmente e maneho credito ta bay ta acepta e tipo di desaroyonan aki y si tambe esaki ta desaroyonan aceptabel pa Aruba.
E director di SVb a bisa cu nan a presenta diferente recomendacion na Gobierno. Un di e recomendacionnan ta cu ta kere cu ta necesario pa riba termino cortico duna un claridad na comunidad kico ta bay para cu e pension di AOV, si ta bin cambio den edad pa tin suficiente tempo pa a asegurado por anticipa e cambionan aki y prepara su mes.
Banda di esaki a mustra cu a haci algun calculo y ta kere cu tin espacio den e seguro di viudes y orfandad cu por crea surplusnan cu por yuda e fondo di pension di vehez na final di dia. "E claridad ey ta sumamente importante", Jacobs a remarca.
