ORANJESTAD (AAN) Cuerpo di Bombero merece di consideracion den comunidad, pasobra e trabao cu nan ta haci no ta facil,
y pa mas experiencia cu nan tin, nan ta sernan humano cu ta riesga nan mes bida, pa na prome lugar, scapa bida di hendenan cu ta haya nan mes den peligro di candela.
Berdaderamente, mester pone nan seguridad den man di Dios. For di cuminzamento di cendemento di klapchi te awo (pasobra ainda tin hende ta cende vuurwerk), nan a pasa cu man yen sin tempo pa nan tambe disfruta cu nan famia di cambio di aña y yegada di aña nobo 2024. Y comosifuera tiki, nan mester a confronta tambe cu dos candela grandi unda den menos di 24 ora dos famia a keda sin dak y sin pertenencianan.
Danki Dios nan personanan ta safe. Riba potret por wak un imagen so, di tur loke personal di Brandweer mester a paga pa nada bay na extremo, pasobra for di man e potret ta mustra kico algun persona cu a cende klapchi a causa caba.
