Trato igual pa permanencia ciudadano Hulandes den Reino punto clave
- Cambio Gobierno di Reino den era di exigencia politico mundial nobo
- Entrada liber na Hulanda lo a crea habitante part time y hub pa e pais
ORANJESTAD (AAN) E momento importante pa cual DIARIO a prepara su lectornan na 2023, a bati na porta cu entrada di 2024, den cual gobiernonan cu a wordo eligi na forma democratico rond mundo, mester bay cumpli cu e exigencia di nan Pueblo.
Uno di e exigencianan mas grandi cu a bini dilanti den e eleccionnan pa gobernantenan y Parlamentonan na paisnan rond mundo tabata, pa controla migracion y sigur e crecemento incontrola di poblacionnan na paisnan liber y cu un nivel di bida aceptabel.
Informantenan internacional, cu ta sostene e labornan di DIARIO pa informa Pueblo di Aruba, a mustra con na nivel internacional, protestanan ta lanta contra Gobiernonan pa e forma cu ta atende cu migracion sin un bon control di e impacto cu migracion tin riba calidad di bida di habitantenan di un pais.
Cifranan ta duna prueba cu den hopi caso e forma cu ta atende cu refugiadonan di guera, di dictadura of di caida social financiero di paisnan, ta mishi directamente cu e calidad di bida di e ciudadanonan di paisnan.
Un sentido nacionalista a wordo crea rond mundo na paisnan liber, cu tin problema di cumpli cu e necesidadnan di nan propio hendenan pero ta sigui admiti crecemento di poblacion cu ta trece exigencianan pa gobiernonan.
Un posicion gubernamental, cu Gobierno di Aruba a asumi tambe den gobernacion di e poblacion di Aruba, cu segun Gabinete Wever-Croes no por carga un deber financiero cu e no ta capaz pa carga.
Paisnan di Union Europeo mester bay eleccion y uno di e puntonan cu ta bini dilanti ta e forma cu e bienestar di habitantenan di e paisnan a wordo afecta pa falta di areglonan cu ta controla crecemento di comunidadnan pa motibo di migracion na momento cu e forma cu edad ta subi por ehempel, ya ta nifica un peso pa e paisnan cu entre otro mester ahusta nan pensioennan di behez entre otro cu resultado pa e bida social di poblacion.
Nacionnan Uni ta conoci cu e problema mundial actual y ya na 2022 a introduci un asina yama Siman di Migracion pa e punto aki por bira discutibel. Mas di 3 Mil persona a participa na 2022 na eventonan pa atende cu e tema aki na diferente lugar na mundo.
Segun e programa aki mester evita cu migracion ta crea problema pa e poblacion pa medio di e forma cu e seguridad ta wordo pone na peliger pa falta di sistemanan ordena cu ta haci posibel pa comunidadnan por asisti personanan cu a bira victima di gobernacion na nan pais pero sin deshaci di e derechonan di nan poblacion.
Informantenan a mustra DIARIO cu uno di e productonan di negociacionnan actual pa un Gobierno nobo na Hulanda, mester bira e forma cu entrada di e pais ta soluciona problemanan di e Hulandes, cu manera DIARIO a trece dilanti a bira pober na uno di e paisnan mas rico na mundo.
2024 lo bira e aña den cual gobiernonan lo mester atende cu migracion y pa Aruba como partner igual den Reino Hulandes, esaki lo conduci na cambio di areglonan actual den Reino Hulandes.
“No papia solamente di Wilders, cu ta e figura politico cu abiertamente y na forma hasta alarmante a papia di un Hulanda pa e Hulandes,”a bini dilanti.
Manera DIARIO a splica for di 2023, e Gobierno Hulandes nobo den su mayoria segun negociacion actual, lo wordo forma pa partidonan cu ta nobo of ta opone e maneho cu a wordo hiba dor di Mark Rutte, e Ministro Presidente saliente di Hulanda.
2024 lo bira sumamente interesante pa Reino Hulandes, cu mester tene cuenta cu cambionan den e forma cu actualmente Arubianonan por establece y traha na Hulanda, mientras Hulandesnan mester di permiso pa establece nan mes na Aruba.
Informantenan a indica cu uno di e problemanan grandi lo ta e hecho, cu e sistema di gobernacion den Reino ta haci, cu tin personanan cu ta inscribi na Hulanda y ta goza di beneficionan Hulandes, mientras nan ta pasa temporadanan di algun luna na otro pais den Reino.
No ta migracion interno so ta afecta Reino, cu conoce aparentemente personanan cu a uza Aruba como un hub pa haya nacionalidad Hulandes y despues establece na Hulanda.
Informantenan a mustra riba e cantidad di placa cu Aruba mes mester inverti pa motibo di entrada ilegal na Aruba, cu no solamente ta wordo confronta cu personanan cu ta busca un refugio debi na e realidad na nan pais, pero tambe pa e ocasion cu ta wordo habri pa criminalidad y seguridad di e Arubiano.
Segun informantenan clave, migracion ta bira e topico mas importante na nivel internacional na 2024, a base di resultadonan directo di eleccionnan carga cu exigencianan di votadornan, manera sigur ta e caso den Reino Hulandes.
