Pronostico di DIARIO riba economia ta bira berdad na entrada di 2024
- Secretario General di OPEC no por mira un futuro sin petroleo
- Aparentemente mas petroleo cu nunca cu prijs cu ta keda bou $80
ORANJESTAD (AAN) Calor inmenso y condicionnan nunca experencia na hopi parti di mundo, ta e realidad cu cual Planeta Tera a saluda 2024, cu mester a bira e porta pa cambionan grandi riba tereno di energia.
Cuanto credibilidad por duna e Conferencia di Clima cu a pone dirigentenan costoso pa Pueblo di casi tur pais na mundo reuni na final di 2023, ta keda e pregunta grandi cu hende ta haci su mes.
DIARIO a splica Aruba, cu e forma cu e conferencia importante aki a termina, ta cuestiona seriamente e pregunta, cual partido lo gana den e ring di boxeo, cu mester dicidi pa bienestar di hende riba tur tereno.
Kico resultadonan climatologico lo ta pa hende, ta bini dilanti den tur e informacionnan di condicionnan di tempo.
Mundo por lo general lo ta mas cu un grado mas calor cu normal na 2024 y alarma grandi a wordo bati aunke e pregunta grandi ta keda, kico lo pasa.
Ta na e momentonan aki e declaracion di e Secretario General di OPEC, Haitham Al Ghais, ta duna un indicacion cu DIARIO den su presentacionnan di informacion na 2023 tabata tin razon pa adverti den e dos interesnan cu ta cruza otro, cu ta e bienestar di bida di hende na mundo y e peso di petroleo den economia mundial mientras no tin alternativa.
Segun Haitham Al Ghais, e no por mira e final di petroleo como e creador mas grandi di trabou y entrada na un gran parti di mundo caminda biyones di petroleo ta duna hende nan pan di cada dia.
Informacionnan cu ta bini dilanti di Venezuela ta duna impresion cla di preguntanan serio cu mester wordo haci na e momentonan aki.
Venezuela na caminda pa 2030 lo reduci su emision di gasnan cu ta afecta medio ambiente cu 20 porciento, pero e lo sigui produci cu azeta manera e ta haci te awor loke ta nifica cu no por spera cambio den loke expertonan mundial ta considera como un peliger pa hende e region.
2024 ta habri na e forma cu DIARIO a splica su lectornan cu inversionnan enorme di capital den negoshi riba tereno di energia.
Ayera prijs di petroleo a subi pero despues a bolbe baha pa alcansa 80 Dollar of menos. Pa cuanto tempo esaki lo ta, no ta conoci pero si ta conoci cu e negoshi di petroleo lo sigui produci entradanan enorme na e sector petrolero, mientras di otro banda inversionnan enorme ta wordo haci pa yega na combustibel mas limpi cu mester ta e solucion den e calentamento di tera.
E situacion cu ta presenta su mes na e momentonan aki riba mercado mundial, ta contra e espectativanan cu tabata tin cu e problemanan na Medio Oriente lo a subi prijs di petroleo.
E opinion aki a wordo lansa a base di e loke ta costumber cu problemanan politico mundial ta causa cu prijs di petroleo ta subi.
E conclusion di e situacion mundial segun expertonan cu DIARIO ta consulta ta, cu na e momentonan aki ganashi ta wordo haci cu petroleo a base di e realidad cu si e petroleo keda den suela, e no ta produci nada.
Pues e produccion petrolero ta genera placa mescos cu e inversionnan cu mester wordo haci pa haci petroleo mas limpi pero tambe produci alternativanan pa petroleo.
Pa e publico esaki ta sona bon pasobra prijs di gasolin y tambe di comodidadnan ta keda abou, pero na mes momento e ta pone tur hende recorda cu den un rato e prijs di petroleo por bolbe subi.
Importante ta bira pa mira e paisnan productor di petroleo cu Merca como productor number dos y Rusia como productor number 3 na mundo, na momentonan crucial cu Merca ta prepara pa eleccion mescos cu Rusia, aunke e eleccion na Rusia ta diferente for di eleccion Mericano y sigur no por yama su mes democratico.
2024 a bati na porta. DIARIO ta sigui vigila tur desaroyo na momentonan crucial den un mundo na 2024, cu lo ta aña di transaccionnan enorme, di negoshi, di inversion den cual mester inverti den productonan mas limpi pero tambe den azeta cu ainda no a wordo reemplaza.
