Cuatro proyecto cu Gobierno ta bay garantiza eliminacion di red tape pa yuda inversionistanan stranhero

Gobierno riba bon paso

ORANJESTAD (AAN): Ministro di Economia, Geoffrey Wever a indica durante conferencia di prensa mas detaye riba e trayecto implementacion di Landspakket pa reforma economico.

   Esaki ta e decisionnan cu Gobierno di Aruba a bay di acuerdo cune cu Hulanda, y a cuminza traha riba dje pa cu reforma economico y e introduccion di Landspakket, cu e meta pa mehora di clima empresarial y inversion.

  Ministro Wever a reitera cu apesar di e situacion dificil na Aruba, toch e isla ta uno di esnan mas fuerte den region, cu mas prosperidad y floresciente den region di Caribe.  Loke ta fuerte ta cu e Producto Interno Bruto (GDP) per capita ta di 29.505, compara cu e 9.900 di region Caribense.  Tambe e Crecimento Real di Producto Interno Bruto (GDP) su promedio di 2010 pa 2019 ta 5.2%, compara cu 9.7% di e region Caribense.   Desempleo hubenil na 2018 na Aruba tabata solamente 16.0%, compara cu e 26,0% di region Caribense.

   Ademas di esey, tin retonan grandi tambe pa Aruba, e.o. e debe publico halto, e embehecimento demografico, e gasto halto di cuido medico, y tasa di participacion abao.

   Sin lubida cu tin ainda varios obstaculo pa empresario- y inversionistanan, e.o. di e mercado laboral, mercado di capital, mercado di producto y servicio, etc.  Tambe legislacion cu Gobierno tin di mehora, combina cu procedimentonan y sistemanan anticua cu tin di wordo reemplaza.

   Ora cu un empresario pidi permiso, y e dura mas di 12 siman pa wordo duna, esaki ta pone e empresario bay den ‘bezwaar’ y esaki ta trece gasto adicional, y ta trece un clima di incertidumbre pa e empresario na Aruba, como cu e no sa kico su posicion huridico ta.  Aki bo ta bira victima di sistemanan anticua cu ainda tin na Aruba.  Esey hopi biaha ta pone comerciante usa otro caminda pa por haya nan permiso.

   Esaki ta parti di proceso legislativo cu tin di haya cambio, segun Ministro Wever a mustra.  Aki kier bin cu un estudio pa haya sa kico ta e necesidad pa introduci cambio.

   Meta di e reforma economico di Landspakket ta pa crea un economia dinamico y resiliente, pues mester tin e metanan bon stipula cu fundeshi fuerte pa asina comercio por sigui.  Pero e parti aki ainda Aruba ta tiki atrasa den dje.

   Cuatro recomendacion:  Gobierno a pidi e ora como parti di Landspakket pa un compania Hulandes di Consultancy (Economisch Bureau Amsterdam (EBA) a haci un investigacion completo di e sistema di base di economia di e isla.  A base di e investigacion, nan a bin cu 4 recomendacion poni den e rapport “Ondernemings- en Investeringsklimaat Aruba”.

   A inventariza tur 25 rapport cu ya a wordo skirbi riba e economia di Aruba caba, y basa riba esaki nan a bin cu 150 recomendacion y punto cu mester wordo cambia, ahusta, of reemplaza pa asina haci e economia mas fuerte.  Pero pa bay haci tur 150 pa awor ta dificil, mirando e situacion financiero di e isla.  Pesey a dicidi na duna 4 proyecto haya tur prioridad.  Ta cuatro proyecto cu e Consultantnan a considera di ta esnan mas importante y bon hinca den otro, pa asina por haya un economia fuerte.  Ora un inversionista di exterior bin, e por sinti su mes den un clima structura, unda caminda su derechonan ta protehi y si e haci inversion, e ta haya e asistencia di Gobierno.

   Proyecto 1: Esaki ta pa acelera e proceso di tuma decision, inventariza con e sistema di tuma decision ta funciona, y check cual ley tin di wordo cambia pa tin claridad riba e topico aki pa cu dunamento di permiso.  Cada ley tin su procedimento y e prome tarea ta pa inventariza con por optimaliza esaki y con tin di mehora esaki, y update e rekesitonan anticua.

   E lo dura 12 luna, y lo busca un experto huridico pa asisti tecniconan Arubiano pa por culmina esaki, y cambia e leynan.

   Proyecto 2: Esaki ta pa crea un stelsel coherente pa permiso, combina cu un loket digital virtual pa inversionistanan.  E ta entrega un biaha so na un solo lugar e papelnan necesario pa pidi permiso.  Pues no mester bay diferente Departamento mas.  Esaki lo mehora e sistema y acelera e forma di haci negoshi, y lo stimula comerciantenan tambe.  Esaki lo wordo haci den dos fase, y lo dura total di 18 luna pa e proyecto.  Tin di busca un projectmanager externo pa haci esey.

   Proyecto 3: Esaki ta implementacion di “Aruba Fair Trade Authority”, cu ta un organo independiente cu ta haci trabao di crea un veld husto pa tur hende.  Ningun comerciante lo haya beneficio, pues e lo bay ta igual pa tur hende.  Percura asina cu tin competencia husto, y esaki lo bay dura 12 luna pa wordo implementa.

   Proyecto 4: Esaki ta pa mehora y pone cu un inversionista por habri un cuenta di banco mucho mas eficiente compara cu antes.  Aki kier bin cu un sistema na un forma cu e ta bay socede mas rapido, basa riba un analisis di riesgo cu ta mas rapido.  Aki ta crea un grupo di trabao entre Banco Central y Banconan Local pa asina mira con ta acelera e procedimento, unda ta haci palabracion concreto pa acelera apertura di cuentanan bancario, pa evita cu e ta tarda hopi luna pa socede.

  Tambe ta bay papia riba acceso bancario basico pa tur hende.  E proyecto aki lo dura 6 luna y lo bay busca un experto externo pa haci esey.