Posicion Zelensky contra Weganan Olimpico tin mes base
- E observacion religioso mester duna animo pa opone crueldad
- Rusia ta horta mucha inocente for di nan mayornan na Ukraine
ORANJESTAD(AAN)- Awe mundialmente e observacionnan di Cuaresma ta cuminsa.
Segun tradicion, feligresnan ta acudi na Misa cu nan ta bandona cu un Cruz di Shinishi riba nan frenta y e memoria di e palabranan cu “di shinishi hende ta bini y ta shinishi hende lo bira na final”.
Na 2020, pa prome biaha for di tempo di Guera, Misa no por a habri porta pa hende observa Cuaresma debi na e Pandemia Covid-19 cu a haci hende enemigo di bida di hende.
Hende a wordo separa completamente for di otro y hasta mama y yiu, esposonan den nan casnan, a ricibi e advertencia pa evita compania cera di otro.
Hasta rosea humano a bira peligroso pa otro ser humano, loke a haci cu hende no por a bini hunto na Iglesia pa reza hunto manea ruman.
Miyones y miyones di hende a bira victima di nan relacion cu hende y bira victima mortal di e pandemia, cu awe ta tras di lomba.
Awe mundo ta confronta loke por considera un enfermedad humano, cu ta e pensamento di poder, cu hopi bez ta bandona loke ta normal pa asina destrui otro hende.
Na momento cu awe Aruba y mundo ta observa Dia di Shinishi, inicio di Cuaresma, crueldadnan espantoso ta tuma lugar rond mundo na Ukraine pero tambe na Aruba, caminda hende ta trata na destrui felicidad of bida di otro.
Tirania, hamber pa poder, cu ta motibo cu hende mester celebra Cuaresma, ta haya contenido nobo den loke ta pasa na Rusia, caminda un homber hambra pa poder manera Putin, sin mas ta invadi Ukraine, ta destrui bida humano, horta tur loke por horta.
Kico mundo ta haci?
Palabra bunita ta resona rond mundo awe mientras sostenedornan di Putin y otro despotanan cruel, ta drenta Nacionnan Uni cu e mes derecho cu hende cu ta entrega nan bida pa paz.
E epoca den cual nos ta papia di Herodes y Hudas a cuminsa na un momento, cu na Aruba criminalidad ta continua mescos cu na tur pais di mundo, caminda victimanan hende ta destrui bienestar di otro como ladron, como asesino, como destructor.
Si mundo kier cambio, mundo mester bandona hipocrecia y den esaki nos ta Zelensky razon completo ora el a reclama cu ta permiti atletanan di Rusia participa na Weganan Olimpico, cu mester fomenta hermandad, sentimento humano, cerca hende.
Pakico ta celebra Cuaresma? Pa recorda cu como hende inocente Hesus a wordo mata dor di hambrientenan pa poder.
Awe Putin ta mata. Awe dictadornan den e region di Aruba tambe ta horta propiedad di hende y ta mata hende pa nan keda cu poder y posesion.
Awe Hudas y Herodes ta drenta Nacionnan Uni y ta evita sancionan nobo contra sanger di inocentenan cu ta drama na Ukraine y na otro paisnan caminda dictadornan ta trapa cu nan pia riba hende.
Tradicionnan di Iglesianan cu ta observa Semana Santa, ta bolbe na normalidad. Kico ta normalidad? Kico e dolor di Pandemia cu a mata nos sernan stima a splica nos?
Unda nos protesta ta keda ora paisnan dirigi pa destructornan ta dicidi kico nos mester haci na mundo pa medio di instancianan manera Nacionnan Uni? Kico nos mester haci enfrente encuentronan deportivo cu nacionnan dirigi pa criminalnan?
Cuaresma ta e epoca pa recorda nos cu Cristianismo como vehiculo di luz no por yega na compromiso cu loke ta paga luz.
Awe loke nos ta propaga como fe ora nos tin un cruz di shinishi na nos frente, ta papia di e balor cu nos ta duna nos mes y otro hende como ser humano, cu no por wordo condena na cruz pa nos por canta victoria.
Awe cu e Cruz di Shinishi nos mester recorda cu un dia nos tur mester duna cuenta di loke nos a permiti cu nos silencio y nos miedo pa lanta para pa loke nos ta kere!
