ORANJESTAD (AAN) –Alfredo Koolman, director di WEB Aruba NV, den su declaracion pa pueblo di Aruba for di Groningen, el a duna di conoce cu e delegacion a bishita diferente lugar unda nan ta desaroyando e concepto di Hydrogen Valley.
Nan a bishita e parke di molina di biento, y a tende di tur e plannan cu nan ta desaroyando na Hulanda, no solamente den e region di Groningen, y cu ta plannan pa genera coriente a base di hydrogen, di manera por uza e gasnan como combustible pa auto, pero tambe electricidad.
Koolman a expresa cu esaki ta un bon lugar pa bishita y wak tur e concepto di produccion di Hydrogen Valley por wordo uza pa energia pero tambe pa transporte (auto) unda nan por a mira ehemplonan bunita.
Tambe nan a bay na e region banda di aeropuerto unda nan por a observa tur e proyectonan piloto cu tin eynan. Ademas a wak e transporte regional cu ta hopi impresionante pa mira con ta realiza e proceso paso pa paso, y esaki ta sirbi como un bon ehemplo pa Aruba, unda ta bay desaroya e proyecto di Hydrogen Valley, den e Distrito di San Nicolas riba e tereno di ex-refineria.
Koolman a subraya cu nan ta bin hopi positivo y cu e seguridad cu hunto cu e stakeholders y gobierno, lo por desaroya e plan aki e siguiente simannan.
