Pa trata abuso sexual y violencia relacional severo:
ORANJESTAD (AAN)—Diahuebs mainta a tuma lugar e conferencia di prensa di gobierno, den cual Minister di Husticia y Asunto Social, señor Rocco Tjon, a hiba palabra y a elabora tocante e medico forensico pa Aruba, y seguridad na frontera.
Confirmando e noticia cu Aruba lo yega na su propio medico forensico, den persona di Dr. Vincent Latour. E dignatario a expresa cu esaki ta un paso hopi importante, dentro di e pasonan cu nan ta tumando como Gabinete, pa combati abuso sexual y violencia relacional.
E mandatario a subraya cu e tarea di Dr. Latour lo ta yuda den investigacionnan di abuso sexual y violencia relacional severo, y e importancia di esaki ta cu e lo fortifica e investigacionnan penal, ora un caso ta wordo presenta dilanti un Huez.
Esaki lo conduci cu por duna un persona un castigo mas halto. E dignatario a señala cu hopi biaha el a trece e importancia di esaki pa dilanti, y ora e ta papia cu e stakeholders tambe nan ta indica cu locual ta mas importante ta e investigacion cu ta wordo conduci; y cu e paso concreto aki lo percura pa e investigacionnan cu ta wordo presenta dilanti un Huez, ta mas solido ainda y obviamente e lo fortifica e fluho di informacion y lo fortalece e colaboracion den full e cadena tambe.
Minister Rocco Tjon a subraya cu e fluho di informacion entre JZP, KPA, HOH, Voogdijraad, Departamento di Asunto Social, Bureau Sostenemi, Ministerio Publico, Veiligheidshuis y demas partner lo bay mucho miho.
Tocante e procedure pa selecta Dr. Latour, Minister Rocco Tjon a confirma tur loke a sali relata den DIARIO su edicion di Diahuebs ultimo.
E mandatario a señala cu un bez cu e medico caba su estudio e lo traha pa Pais Aruba algun aña, pa asina garantiza cu e tin e profesionalismo y specialismo aki, pa e añanan nos dilanti.
Minister Rocco Tjon a reitera cu e medico forensico ta un di e tantisimo paso cu gobierno a tuma pa loke ta casonan di abuso sexual cu ta dunando fruto caba. Lo sigui cu otro stap importante cu ta introduci un Recherche Psicologo cu lo tin e tarea di analiza y, den e caso aki, aconseha e departamentonan investigativo pa loke ta declaracionnan cu ta wordo duna door di e victimanan pa asina, na final di dia, por haci un investigacion hopi mas solido.
