ORANJESTAD (AAN): Parlamentario Gerlien Croes di AVP ta indica: "cu asombro y manera un bofta den cara di huristanan Minister President a manda un carta como contestacion ariba e pregunta hasi door di fraccion di AVP,
si Minister di Salubridad Dangui Oduber ta un sospechoso den e caso di vacuna gate na e momentonan aki.
No solamente a desvia di e hecho cu e Minister encarga di e departamentonan unda e fraude a tuma lugar tin un responsabilidad politico, pero alavez ta purba di sconde e hechonan cu entre otro Minister Oduber ta esun cu e nombra e campañadornan aki na pia di trabou como arbeidscontractant y tambe a duna nan un carta di bon recomendacion na momento cu nan a wordo kita for di trabou pa motibo di fraude grandi cometi.
Segun e ley popular di Integridad cu gobierno a carga na halto tanto tempo un Minister mester informa e Minister President durante gobernacion si tin situacionnan of hechonan cu a presenta cu lo tabata situacionnan cu lo a tene cuenta cu ne tambe promer cu e por a pasa screening pa huramenta.
Minister President na su lugar ta manda Parlamento di Aruba un analisis completamente robes y cu interpretacion propio pa usa esaki na fabor di e situacion y ta pone descripcionnan huridicamente incorecto unda hasta ta capaz di bisa den 1 di su conclusionnan cu e articulo pa cu control di integridad despues cu e minister wordo nombra caba y ta den funcion, (Art 13) no ta aplicabel ora tin hechonan y situacionnan nobo y recien wordo constata.
Den otro palabra, ley di integridad no ta aplica despues cu bo huramenta si presenta hechonan of situacionnan nobo, cu wordo constata recien, y cu ta contra tur principio di integridad.
No solamente e Articulo 13 aki ta referi na un Articulo (2) inciso cu ta inclui investigacionnan hudicial, pero tambe e articulo no ta limitativo na e lista di hechonan y situacionnan menciona den e segundo inciso manera e promer minister ta purba describi.
Segun promer Minister, su persona a confirma cu Openbare Ministerie cu na momento aki no tin investigacion andando contra e minister di salubridad y cu ta algun arbeidscontracten cu tabata traha na DVG ta wordo investiga na e momentonan aki.
Pregunta primordial ta keda si ya caba OM a yega asina leu pa identifica ken ta e beheerder di full e sistema cu ta traha como man drechi di e Minister encarga y alavez kico OM ta considera di e hecho cu e personanan aki a wordo kita for di trabou despues cu a constata e fraude y minister a traha un carta di BON recomendacion pa nan pa asina nan por keda keto y sigi busca un otro trabou y laga tur e realidad di e miyones cu e wordo traha cu e vacuna- gate aki den un doofpot.
Pueblo kier sa kico ta e motibo cu tin e sistema y datonan nan di comunidad ariba un cloud (internet) warda den un asina yama 'block chain system' y kico tur ta minister su actividadnan cu su persona y tambe conseheronan ta hibando ariba e sistema aki. Ta 1 persona tabata encarga cu duna e acceso na full e sistema y tabata tin e control di tur locual tabata sosodiendo y esey sigur no ta e arbeidscontractenan cu sra. Promer Minister ta menciona.
