Cumplimento cu Ley ta exigencia basico di un Estado di Derecho --- *Maneho di propiedad di Pueblo no conoce haula di color politico --- *Mester scrap uzo di palabra “tereno di Gobierno” den vocabulario
ORANJESTAD (AAN)- E siman aki autoridad a bolbe drenta den accion. Ministerio Publico a anuncia cu a detene un persona pa asuntonan cu lo por ta relaciona cu otorgamento di tereno di Aruba.
Di e forma aki, caso Flamingo a drenta un fase nobo den publicidad, pues den atencion publico.
Flamingo a reuni cu Avestruz y Ibis, cu ta dos caso penal cu directamente ta mishi cu gobernantenan cu a ricibi e encargo di Pueblo pa maneha e pais na interes general nacional.
Avestruz directamente tambe ta relaciona cu parha cu lo por a dera su cabez den tereno di Aruba mientras cu Ibis ta relaciona cu permiso.
Cu e prome detencion preventivo den e Caso Flamingo, e cantidad di persona cu mester responde autoridad riba e forma cu por a trapa riba leynan cu ta dicidi con ta otorga propiedad di Pueblo, a cuminsa aumenta.
Luna di Maart sigur lo bay trece revelacionnan importante riba maneho di tereno cu ta propiedad di e pais Aruba y asina di Pueblo di Aruba.
Mientrastanto e prome pregunta cu nos mester haci nos mes ta, kico ta bay robez den e sistema democratico di Aruba, cu ta exigi pa gobernantenan na nomber di Pueblo, maneha e pais y asina propiedadnan di e pais.
Na prome lugar, na nos parecer, tin un problema cu e concepto di “tereno di Aruba”, cu hopi hende ta considera “tereno di Gobierno”.
E suelo di Aruba ta sagrado. E ta propiedad y identificacion di e Arubiano for di su nacemento.
Pueblo di Aruba ta doño di tur tereno cu no tin propietario priva.
Gobernantenan huramenta ta maneha e pais y terenonan cu mester wordo otorga na personanan cu a base di Ley ta cualifica pa haya un tereno na interes di nan bienestar.
Ley ta dicidi riba asina yama tereno comercial cu mester sirbi economia di e pais, cu mester pone cuminda riba mesa y haci posibel pa e Arubiano por tin un bon nivel di bida.
Na momento cu negoshi wordo haci cu tereno, ta kibra leynan di Aruba cu mester proteha bienestar di tur Arubiano sin distincion.
Color politico di un persona no por determina si e ta haya un tereno pa e por traha su cas. Color politico di un persona no por dicidi si e ta haya un tereno pa un proyecto na interes di Aruba.
Placa riba of bou mesa tampoco por kibra Ley, cu ta sagrado na un pais democratico pasobra Ley a wordo introduci pa evita cu cualkier ciudadano ta bira victima di su condicion di bida of preferencia personal.
Awe mundo ta pasa den momentonan serio. Momentonan cu ta indica, con hende por wordo destrui pa otro bira doño di nan suelo, nan tereno.
Perdida di derecho di un persona ta resultado di situacionnan cu ta bay contra Ley cu mester proteha comunidad.
E siman aki autoridad a anuncia inicio di un etapa nobo den Caso Flamingo, cu a conoce su prome detencion a base di supuesto iregularidad cu tereno.
Personanan cu a wordo paga dor di Pueblo pa sirbi interes di Pueblo, lo mester responde autoridad mescos cu personana cu a wordo beneficia cu “tereno di Gobierno” cu den vocabulario mester wordo reemplasa pa “tereno di Pueblo” pa ta mas cerca di realidad.
Ta keda un pregunta. Cuanto bez ta mira empresa priva hiba trahador of director cu a abusa di su trabou y beneficia otro hende, dilanti Huez? A yega di haci un estudio riba e materia, cu lo mester bira conclusion pa yega na defensa optimal di interes di Pueblo!
