ORANJESTAD (AAN) – Fundacion pa Nos Comunidad (FPNC) tambe a forma parti di e reunionnan di stakeholders cu Formador, Evelyn Wever-Croes y su team.
Señora Carolina Hart a atende cu e encuentro aki, y den conferencia di prensa el a duna su comentario al respecto.
El a splica cu e fundacion a haya invitacion di Formador Wever-Croes pa FPNC elabora riba e trabao cu nan ta haciendo actualmente, y tambe den cuadro di e proyecto di ayudo cu pakete di alimento na e clientenan existente di Cruz Cora.
“Pero tambe nos a elabora tocante e futuro di Fundacion pa nos Comunidad, kico pa nos ta importante pa salvaguardia e existencia di e fundacion, y tambe pa yuda nos clientenan, den futuro, na e manera miho posible. Tambe cierto temanan a bin dilanti, manera e fondonan, locacion, e samenwerking cu diferente instancia, y den esaki nos ta premira un bon colaboracion den futuro, cu gobierno”, Carolina Hart a comenta.
El a menciona tambe cu e presupuesto di e fundacion a wordo traha a base di e cifranan cu Cruz Cora a suministra na Gobierno, pa tur hende wordo yuda.
“ Ora di registracion nos a ripara cu e grupo a bira mas chikito. Hopi hende no ta na Aruba mas, nan a bay nan pais cu e vuelonan humanitario, of a cuminza traha bek y nan a bisa cu no mester di yudanza. Mirando cu algun di nan a haya un entrada bastante halto, no a bin na remarca. E grupo awo ta mas chikito di loke a premira, pues sigur tin e fondonan disponible pa henter e proyecto aki” Carolina Hart a duna di conoce.
Fundacion pa Nos Comunidad a detecta algun iregularidad cometi cu e vouchers door di algun cliente, por ehemplo hende cu kier a uza voucher cu no ta na nan nomber pasobra e persona a bay for di Aruba, entre otro, y pesey Gobierno a dicidi pa entrega pakete di alimento y no carchi.
El a trece dilanti cu e pakete di alimento no a cambia, pero ta uno cu pa basta tempo e fundacion ta dunando, y semper el a yega pa un luna. Pesey e fundacion ta haya un tiki straño cierto comentarionan eyfo, cu e pakete no ta yega. E tin di haber tambe con e persona ta maneha e productonan cu a ricibi. Señora Hart a menciona cu ora di entrevista e personanan cu ta aplica, mayoria di nan tin un entrada adicional, sea nan ta chapi of ta bende cuminda, of ta den construccion, of ta ilegal, y otronan tin trabao na 60% di salario y nan por cumpra loke falta cu nan mesun placa.
