Crusero ‘Grandeur of the Seas’ a nabega pabao Aruba djis pa pasaheronan mira vuurwerk

Net ora di cambio di aña

ORANJESTAD (AAN): E barco ‘Grandeur of the Seas’ di Royal Caribbean International a yega Aruba net riba bispo di Aña Nobo, y a drenta waf pa 11:30 am.  Su pasaheronan a gosa di un dia diferente na Aruba, unda nan a mira cantidad di tiramento di pagara riba Diadomingo mes na Playa.

   Nan horario di despedida di Aruba tabata poni originalmente pa socede 9:00 pm.  Sinembargo nan a keda un tiki mas, y te despues di 10:30 pm nan a bandona puerto.

   Pa exactamente 10:32 pm, e barco a cuminsa move poco-poco for di Waf di Playa y ya pa 10:38 pm el a sali for di Paardenbaai rumbo pa lama.  Envez di a djis tuma direccion zuidoost pa asina cuminsa nabega direccion Curaçao, sea el a wordo planifica di antemano of debi cu Capitan a ripara cu tin masha hopi vuurwerk ta habriendo bunita den cielo riba Aruba, a dicidi na tuma un rumbo noordwest pa bay direccion Punta Brabo.

   Prome cu esey el a hala como 2.8 km mas pazuid pa no nabega mucho cerca, y despues a bira pa 10:50 pm direccion noordwest.

   Pa 11:18 pm, Grandeur of the Seas tabata exactamente 3.0 km west di Punta Basora, y aki e capitan a bira direccion nort pa pasa dilanti di Eagle Beach bayendo rumbo pa Palm Beach.  Tur esey mientras cu abordo di e barco nan tin e New Year’s Eve Party, cu monton di blaas wanta den blafon (antes yama ‘plafon’) di e Main Lobby cu ta ser yama ‘Centrum’, unda tabatin aglomeracion di hende baliando cu e banda.

   Pero pafo di e barco, mayoria di hende tabatin bista pa e beyesa den cielo riba Aruba, cu monton di vuurwerk keto bay explotando riba e isla.  E barco a sigui move poco-poco direccion di Palm Beach.

  Pa exactamente 11:40 pm, net ora cu e barco tabata na 4.6 km west di Holiday Inn Resort, el a cuminsa bira direccion pariba.  Despues pa 11:50 pm, pabao di RIU Palace Hotel el a cuminsa nabega bay zuid, cu hopi hende para pafo pa mira con diripiente e cantidad di vuurwerk a aumenta drasticamente.  Aruba a bira un ‘showcase’ pa e riba di 2.400 pasaheronan abordo.

   Ora cu 12:00 am y aña nobo a drenta, e barco tabata bayendo zuid na distancia di 3.0 kilometer net west di Amsterdam Manor.  Aki e capitan a reduci e velocidad aun mas hopi, y poco-poco a pasa dilanti Eagle Beach ta bay zuid admirando e cantidad di vuurwerk riba e isla.  Nan a mantene e velocidad lento aki te banda di 12:15 am, ora cu nan tabata yegando pabao di Manchebo Beach Resort, y aki a hisa velocidad bek pa sigui bay mas pazuid, y pa 12:30 am ora cu nan tabata na 3.4 km zuidwest di Punta Brabo, nan a sigui hisa velocidad y tuma direccion zuidoost pa porfin tuma rumbo pa bay na nan siguiente Waf, cu ta Curaçao.

   Pa 1:00 am nan tabata zuidwest di Barcadera, y pa 1:50 am ya nan tabata banda di Punta Basora na e parti mas pariba di Aruba, ta sigui aleha.  Durante e ora ey nan a keda mira basta show di vuurwerk riba Aruba.