ORANJESTAD (AAN) – E emocion di cambio di aña y nacemento di un aña nobo semper ta trece un sentimento di alegria inmenso y speranza, y e cambio di 2023 pa 2024 no tabata un excepcion.
E cielo di Aruba a keda refleha esaki, cu cendemento di vuurwerk den tur distrito, tur bario, den tur skina di Aruba, ora famianan henter a para dilanti porta di nan cas pa cende klapchi cu den forma di un yobida di strea di mil color, a baha for di firmamento, mientras cu prome cu 12 or di merdia te cu 12 or di marduga y mas ainda, pagaranan a wordo cendi tambe pa aña bieu bay cu fucu, manera ta e tradicion, unda e brindis di bon bini no a falta.
Dios bendiciona pueblo di Aruba cu hopi bienestar spiritual y material, pa nos tur tin prosperidad integral. Tambe ta na su lugar pa desea tur persona cu a pasa e cambio di aña y binimento di 2024 cu kibrante di salud sea na cas of interna na Hospital, pronto recuperacion y tur esnan cu ta den tristeza pa un of otro motivo, e aña nobo aki yena nan cu forza, salud, energia positivo, speranza y FE.
{gallery}Bunita vuurwerk a ilumina cielo di Aruba cu streanan multicolor y sentimento di amor, Fe y speranza pa 2024{/gallery}
