Cantidad di personanan interna tambe a subi --- *1028 caso nobo y 3327 caso activo
ORANJESTAD (AAN): Cifranan record a keda registra diamars ora cu a anuncia e dobel di e cifranan compara cu dialuna (unda a keda registra 541 caso nobo).
E resumen di diamars a mustra cu 692 persona a recupera y un total di 1028 caso nobo di COVID-19 a keda registra di cual 99 ta no-residente.
E cifranan aki ta representa un 'Positivity rate' bou di residentenan di 66%. E cantidad di casonan activo di COVID-19 ta 3327 y cantidad di fayecidonan relaciona cu COVID-19 ta 181. Datonan ta ilustra casonan nobo di COVID cu un averahe semanal di 670 caso pa dia y un averahe di 'positivity rate' semanal di 61% pa dia.
Actualmente na Aruba tin 21 persona interna debi na COVID di cual den ICU tin 2 persona y riba piso general tin 19.
Na Colombia tin actualmente 3 persona den ICU y ningun (0) riba piso general.