ORANJESTAD (AAN): Riba Diabierna, Directiva di Sindicato S.T.A. hunto cu su delegadonan a firma e promer Contracto Colectivo (CAO) pa cu e compania Costa Linda Beach Resort.
Despues di varios aña di lucha a bin logra firma e contrato colectivo cu ta encera un adelanto tur cos hunto di ariba 15% reparti den 3 aña.
E empleadonan lo conoce adelanto den salario tur aña cuminsando 1 di Januari 2024 cu forsa retroactivo. Tambe lo conoce adelanto den nan placa di spaar, bonus di fin di aña, dianan di vacacion, placa di cuminda djis pa menciona un paar.
Directiva di STA kier a felicita e empleadonan di "Costa Linda" cu nan promer CAO y tambe gradici e delegadonan di STA emplea na Costa Linda esta Giovanni, Daniel y Victor y den mes un rosea gradici gerencia di e compania y nan abogado sin lubida mediador di gobierno di Aruba cu tambe a pone su granito pa asina partidonan por a yega na otro y asina por a firma e CAO pa cu e compania.No tabata un negociacion facil pero atrobe perseverancia a vence.
Un pabian un biaha mas na e empleadonan di e compania cu nan promer contrato colectivo.
