Despues di Carnaval 2024 mester atende crimen contra democracia
- Felicidad di Pueblo ta exigi alegria como compensacion di deber
- Partidonan mester por demanda candidato corupto dilanti Huez
ORANJESTAD (AAN) Dos factor a bini dilanti durante e siman cu ta termina, cu tabata e Dia di Betico, dia di celebracion di e lider cu historia a entrega Aruba pa alcansa su Status Aparte, y celebracion di Carnaval 70, cu ta splica historia con Aruba y su economia a vence e atake di Covid-19, e pandemia cu a deshaci di bida normal na Aruba.
Celebracion di Carnaval 70 ta duna prueba cu Aruba a sigui lucha den pandemia y un situacion mundial desordena.
Lucha, dirigi pa Gabinete Evelyn Wever-Croes, cu a haci posibel, pa Aruba por a hiba un maneho financiero cu awe ta modelo pa Reino Hulandes.
A keda demostra atrobe cu Pueblo di Aruba ta un Pueblo di logro historico y cu e merece tur proteccion pa evita cu su alegria y dinamismo positivo, wordo destrui.
Ora tuma nota di e actividadnan di culminacion di Carnaval cu lo tuma lugar e simannan nos dilanti, ta mira un Pueblo cu a sobrevivi e desastre economico mas grandi cu mundo a conoce den tempo moderno, cu tabata e Pandemia di Covid-19.
Pueblo di Aruba atrobe a vence un reto y asina merece gozo riba su caminda pa futuro.
Esaki ta exigi pues cu tur loke ta enemigo di bienestar di Pueblo mester wordo confronta cu e armanan cu Ley mester ofrece.
Por considera corupcion e enemigo mas grandi di un Pueblo, pasobra corupcion ta destrui sacrificio di Pueblo, ta abusa di fondonan di Pueblo y ta destrui felicidad di un Pueblo.
Corupcion ta ladronicia di pertenencia di Pueblo, cu ta keda sin come si ta necesario pa e paga belasting of otro peso financiero pa su pais por wordo bon goberna.
Mas ruido di mas caso di corupcion a wordo scucha na momento cu Aruba ta prepara pa Carnaval pa despues sigui traha y sigui duna prueba na Reino cu Aruba ta e modelo di gobernacion den Reino.
Un modelo cu mester ta intachabel y cu ta exigi di mundo politico pa tuma tur medida pa Aruba wordo defende contra tur efecto cu e holor di corupcion por tin pa e pais.
Corupcion ta ladronia di placa, cu ciudadanonan ta wordo obliga pa ley pa paga, hasta si nan mester keda sin come. Corupcion ta ladronicia di placa, cu empresanan mester paga, hasta si nan mester bende nan negoshi.
Corupcion ta destruccion di e felicidad y alegria di un Pueblo y mester cera porta pa coruptonan.
Partidonan ta responsabel pa nan candidatonan. Mester cuminsa cu e proceso, cu un partido ta persigui su candidato si resulta cu el a abusa di poblacion den e funcion cu e mester carga.
Partidonan mester kibra y pone tur fin na nan relacion cu gobernantenan corupto y mester investiga e forma cu el a haci uzo di partido, pa deshaci tambe di votadornan cu a sostene corupcion.
Si un partido politico trata na obstaculisa of sconde un caso di corupcion, autoridad mester persigui e partido envolvi.
Mester bini un Ley cu ta haci, cu e Ministro Presidente ta haya mas responsabilidad directo riba maneho cu ta wordo hiba den su Gabinete y ta na haltura di loke ta pasa pa e por actua.
Mester bisa cu por nota un diferencia awor con casonan di corupcion ta wordo trata actualmente dor di Gobierno Evelyn Wever-Croes, cu no ta bay contra e sistema hudicial pa defende criminal condena pa Huez, manera Gobierno Mike Eman a haci.
Pa un persona participa na un eleccion of bira Ministro, e mester di e participacion na un partido politico, cu ta wordo regla na forma oficial.
E partido ta firma un acuerdo cu e candidato cu asina ta haya un credencial pa e por drenta Parlamento, cu ta dicidi pa Ministronan segun decision di Partido.
E partido, cu ta e representacion directo di votadornan, mester tin armanan mas efectivo pa carga su responsabilidad y mester discuti posibilidad pa e partido mes actua legalmente contra e politico, cu faya cu Pueblo y asina kibra e encargo cu representacion di Pueblo ta encera pa no papia mes di e reputacion internacional di e pais.
Mester exigi maximo castigo pa corupcion pa destrui e enemigo mas grandi di Aruba.
Aruba ta celebra Carnaval, cu den un situacion mundial di tension, manera a e costumber di e Arubiano, ta contagia turistanan y mundo cu alegria.
Aruba ta lider den recuperacion economico na 2024 y awor Aruba mester bira lider contra corupcion na mundo!
