Diego de Cuba di Sindicato STA:
- Expertonan forma den JF Kennedyschool y MTS Cesare Terzano
- Pasobra EPB School no ta asina intensivo
ORANJESTAD (AAN) Dirigente di Sindicato STA, Diego De Cuba ta di e pensamento cu gobierno mester evalua si ta bin cu scolnan di ofishi, manera tabata tin den pasado den e epoca prome cu a introduci EPB School na Aruba.
De Cuba a referi na J.F Kennedy Technische School, tambe School di Tarabana, LTS, MTS Cesare Terzano, etc. E ta haya cu EPB School no ta asina intensivo manera e scolnan cu el a menciona.
El a bisa cu Aruba tin hendenan cu ta welder cu ta super bon, profesional cu a studia na J.F Kennedy, LTS, MTS. Tambe tin carpintenan fini, hendenan cu ta traha cu hero, etc., y tin hopi profesional den e companianan grandi cu ta cay bao di WAB, y si algo no wordo haci e experiencia di e hendenan aki lo bay perdi y por sosode manera den e tereno di construccion, cu si wak cuanto hende local y cuando hende di afo ta traha den construccion esnan di afo ta hopi. El a bisa cu e hendenan cu a bin di afo yuda Aruba den construccion tambe ta traha hopi duro, locual STA ta aprecia masha, pero e ta papiando di e existencia di e companianan di construccion cu ta cay bao di WAB.
Tin negociantenan di otro nacionalidad estableci na Aruba, cu ta lanta mall y supermarket cu nan mes ta construi y esaki ta cosnan cu ta permisible na Aruba, y segun de Cuba mester atende cu e problemanan aki na tempo. E ta mira esaki como un fenomeno cu ta haciendo daño caba na e companianan local.
El a agrega cu construccion ta un sector hopi noble, cu ta genera hopi placa, y tin espacio riba mercado laboral, tin hobennan cu ta interesa den e trabaonan aki, vooral esnan descendiente di hende cu a traha den construccion y cu a pasa nan experiencia pa nan yiu of nietonan. Pero tin cu cambia e mentalidad di e muchanan y hinca den nan e interes pa bay den e sector di construccion.
“Pero si no tin un scol manera nos a conoce manera un John F.K, of un Tarabana, anto con nos ta bay cuminza?”, De Cuba a remarca.
E ta enfatiza cu Gobierno mester wak e parti aki y con ta bay stimula un parti di e studiantenan pa wak si nan bay den e direccion aki. El a agrega cu e no ta bay ta facil, e ta bay tuma tempo, pasobra construccion ta un trabao duro. Pero tin muchanan cu kizas a fada di scol, a drop out, y cu kizas tin habilidad pa siña y traha den construccion. Por ta esaki ta e direccion cu e muchanan aki ta fit den dje. Segun e lider sindical mester haci algo lihe pasobra e tempo ta bay laga nos, y pa falta di informacion e muchanan por perde interes.
