Hues ta haya cu e demanda pa declara Ministerio Publico no admisibel ta mucho trempan
ORANJESTAD (AAN): Diaranson mainta Corte di Husticia a sigui cu tratamento di caso Flamingo. E Hues di Curacao cu a bin special pa trata e caso.
DEMANDA TA MUCHO TREMPAN HACI
Hues a tuma un decision riba e demanda di e abogadonan pa declara Ministerio Publico no admisible den e caso Flamingo. Siman pasa a cuminsa cu tratamento di e caso, caminda e abogadonan a bin cu e demanda pa declara Ministerio Publico no admisibel. Tur e abogadonan a bisa cu nan ta haya cu Ministerio Publico a viola normanan durante e investigacion y cu esey ta haci cu mester declara Ministerio Publico no admisibel.
Hues a bisa cu den e estado actual di e caso, ta solamente por declara Ministerio Publico no admisibel, sin tin pruebanan di violacion di norma. Hues ta haya cu e posibel violacion di norma cu abogadonan ta acusa, ta mucho prematuro pa tuma un decision. Hues a bisa cu e abogadonan tin e oportunidad den nan defensa di presenta atrobe e demanda di declara Ministerio Publico no admisibel.
ACUSACIONNAN
E acusacionnan cu e dos Fiscalnan di Ministerio Publico a presenta ta:
- cu Otmar Oduber entre 2017 y 2020 lo a duna hende tereno na Malmok, cual tereno tabata reserva pa otro hende.
- E otro acusacion contra Otmar ta cu e tabatin 3 empleado fantasma o sea nan tabata wordo paga pero realmente nan no ta den servicio di Gobierno. Esaki ta wordo considera malversacion di placa di Gobierno. Ta trata aki di Gilberto Tiel, Laurence Phillips y Hans Geerman, kendenan ta wordo acusa di a gana placa di Gobierno sin cu tabata realmente den servicio di Gobierno entre Januari 2018 y Juni 2020.
- E otro acusacion ta cu Otmar a haci mal uso di su funcion y di a wordo cumpra.
- E acusacion contra e yiu homber di Otmar, Jeandrick Oduber, ta cu e lo tabatin hende ta traha p’e cu tabata traha pa Otmar. Ta considera esaki malversacion di placa di Gobierno entre October 2018 y Juni 2020.
- E acusacion contra e dama Eisia Esser ta cu e ta complice di a wordo cumpra entre November 2017 y 2020. E lo a tuma cosnan di Vito Croes.
- E acusacion contra Richinella Wever ta di falsifica documento relaciona cu dunamento di tereno na Malmok.
DOCUMENTONAN PRESENTA RIBA PANTAYA GRANDI
Pa promer biaha ta mira cu Hues a dicidi di pasa tur documento importante riba pantaya pa asina confronta sospechosonan cu ne. Esaki ta un sistema nobo cu ta di aplaudi.
CASO MALMOK
Hues a puntra Otmar cu e tabata minister den e periodo di 2017-2019 di infrastructura (DIP), medio ambiente (DOW). Otmar a splica con el a drecha DIP pa asina hiba un maneho pa trece actividad economico pa Aruba. El a bisa cu el a coopera cu Landsrecherche den investigacion di caso Avestruz. El a duna orden pa laga Landsrecherche tin acceso na tur cos na DIP. Hues a bisa cu tin sentencia di e minister anterior Sevinger pero den e caso aki tin acusacion contra Otmar pa asunto di erfpacht.
Hues kier sa con Otmar a haci cu e maneho di tereno. Otmar a cuestiona cu no tabatin maneho y ta e minister anterior mes tabata dicidi ken ta haya tereno erfpacht of no.
Segun Otmar, tabatin mas o menos 20 mil peticion pa tereno riba lista di DIP en espera y e minister anterior a duna 250 tereno erfpacht. Otmar a bisa cu el a hiba un maneho nobo pa yuda esnan riba lista pa yega na un tereno sin tin cu bay na minister. Otmar a splica cu e dama Wever tabata e hefe encarga cu tereno pa traha cas. Otmar a bisa cu nunca el a uza su posicion pa dicidi riba ken ta haya tereno.
DOS HENDE RESERVA PA MESUN TERENO
Hues a mustra cu tin 4 tereno (kavel) na Malmok. Tabatin un tereno reserva pa G. El a mustra cu tin un carta na un otro persona P.C. cu Otmar a manda cu ta relaciona cu e mesun tereno reserva pa G. Otmar a bisa cu esakinan ta terenonan grandi di mas o menos 1000 meter cuadra. El a bisa cu tabatin discusion den reunion na DIP caminda tur esnan encarga tabata presente riba e terenonan aki.
Segun Otmar, e minister Sevinger a laga midi e terenonan na Malmok pa entrega. Un aña promer cu 2018 a constata cu tin hopi peticion pa tereno mas chikito. Den otro reunion cu otro departamentonan a dicidi pa duna mas o menos 200 tereno na esnan cu ya tin placa cla pa traha. Den reunion DIP, a dicidi cu lo otorga e 4 terenonan na Malmok.
A DRECHA FAYO DI DOBBEL RESERVA DI TERENO
Despues di lunanan, Wever a bisa Otmar cu tin dobbel booking riba un tereno na Malmok. Otmar a duna orden na Wever pa regla esaki di acuerdo cu loke a keda palabra den reunion na DIP. A papia cu G. y a yega na un solucion caminda G. a haya un otro tereno y a traha su cas. Hues a bisa cu esaki a crea e impresion cu Otmar lo a faborece cierto hende. Otmar a bisa cu esaki no ta manera Ministerio Publico ta pretende. Na opinion di Otmar, tur cos tabata un maneho habri. El a mustra cu den 2 aña, su maneho a duna 1800 tereno. Hues a puntra Otmar si e tin documentonan pa mustra esaki, Otmar a splica Hues cu e ta traha via su cellular y masha poco ta traha riba computer. El a bisa cu el a yama of manda WhatsApp pa Wever cu e tereno reserva pa G. lo ta pa e dama P.C.
Hues a puntra Wever con e combersacion cu Otmar a bay. El a splica cu e combersacion di Otmar tabata riba e dama P.C. promer cu esun di G. Tambe el a splica cu e maneho cu Otmar a palabra ta cu esnan hoben cu tin poder financiero potencial, lo a haya tereno. Segun Otmar, e dama P.C. ta cay bou di e maneho aki. Wever a splica cu el a bisa Otmar cu G. ya ta hopi avanza y no tin bista riba e poder financiero di e dama P.C. Segun Wever, Otmar a bis’e cu cu el a duna orden pa para esun di G. y pasa e tereno pa e dama P.C. Hues a puntra Otmar con esey por ta posibel. Otmar a bisa cu tabatin un error humano di dobbel booking y el a duna orden pa drech’e. El a bisa Hues cu e no ta permiti cu tipo di cosnan asina ta sosode. El a bisa cu esey tabata sosode den e maneho anterior.
Hues a puntra Otmar kico a pasa cu e persona F. cu tereno. Segun Otmar, e mesun cos cu a sosode cu tereno na Malmok. Hues a puntra si Otmar a privilegia e persona F. Otmar a bisa Hues cu e mesun maneho el a hiba pa G., P.C. y F. Hues a puntra si tin notulanan di e reunionnan na DIP. Segun Otmar y Wever no.
Otmar a bisa despues cu el a logra haya algun y lo presenta eseynan den su defensa.
Ta asina cu despues di tratamento di e caso, Hues a palabra cu Diabierna 22 November 2024 lo sigui y Dialuna 25 November 2024 lo por spera exigencia di Fiscal. Despues ta sigui 27 y 29 November cu ta pa defensa.
