Topico ta e forma cu AVP a deshaci di casonan penal importante den pasado - *Estadia den prison ta stroba Benny presenta na su trabou den Parlamento - *Contactonan politico den barionan ta continua en espera di su salida di prison
ORANJESTAD(AAN)—Aruba por conoce un situacion serio segun loke ta topico den cantidad di bario conoci como “centro di Benny” na Aruba, cu ta kere cu eleccion ta tras di lomba.
Esaki sigur no ta e caso pa un cantidad di persona mara a e nucleo di AVP, cu na tur forma a trata di crea problema durante e periodo di eleccion y tambe crea duda hasta den e Estado di Derecho di Aruba.
Topico di personanan cu a acerca DIARIO cu bastante preocupacion, ta sigur loke no a bini na forma suficiente dilanti na nan parecer.
E caso di Benny Sevinger a wordo uza den eleccion 2021 y segun nan ta trece dilanti hasta tabata motibo cu AVP a saca e cantidad di asiento cu el a haya y cu no tabata pa e trabou cu segun votadornan a pensa cu Mike Eman lo a haci.
Segun informacionnan cui ta alcansa DIARIO, for di prome cu eleccion tabata tin un grupo di fanaticonan di Benny Sevinger, cu tabata penetra den barionan pa asina pidi sosten pa Benny cu segun nan, a bira victima di “abuso”.
E hecho cu Benny Sevinger a wordo persigui y encarcela, a wordo uza den seno di AVP mucho mas cu mayoria di persona a pensa y hasta lo a contribui na mas voto pa AVP, cu prome cu e desaroyo rond di Benny Sevinger lo tabata e caso.
Practicamente sin un proposicion cla con pa presenta un gobernacion diferente na loke Aruba a conoce entre 2009 y 2017, AVP lo a uza e suceso di Benny Sevinger como persecucion politico.
Esaki tabata motibo tambe pa cual a mantene Benny Sevinger a todo costo riba lista.
Na e momentonan aki AVP ta prepara su mes pa salida di Benny Sevinger, cu ta den detencion preventivo como sospechoso principal di e caso Avestruz cu mester wordo presenta den sala di Corte di Husticia.
Topico di hopi bario na Aruba ta, kico lo pasa na momento cu Benny bandona prison y presenta su mes pa wordo huramenta como miembro di Parlamento cerca Gobernador.
E hecho cu Benny Sevinger no a presenta huramento ta pasobra e ta den prison y no por haci su trabou for di prison. Si no ta pa esaki, Benny Sevinger lo por ta miembro di Parlamento awe.
Topico ta, cu mester presta atencion con AVP a sa di deshaci di casonan grave di corupcion den pasado cu Aruba a logra lubida. E caso
Fondo Desaroyo Nobo San Nicolas a wordo condena na olvido mientras tabata trata di un caso sumamente serio contra cuatro Ministro di AVP di cual tres a wordo condena pero a sigui biba trankil despues cu e caso a desaparece for di atencion.
Den barionan caminda durante eleccion, siguidornan di AVP a uzo estadia di Benny Sevinger como nan cabay, topico ta keda kico lo pasa ora Benny haya su libertad y wordo presenta na Parlamento pa presta huramento como Miembro di Parlamento di Aruba.
