Cortamento di cinta di un centro dental nobo situa na Solito

ORANJESTAD (AAN): Aruba ta conta cu un centro dental nobo awor cu ta ofrece servicio completo pa cuido y tratamento dental.

   Dialuna 20 di Februari a tuma lugar cortamento di cinta di Dental Wellness. Na e ocacion aki a hiba palabra entre otro propietaria di e centro dental nobo aki esta Oscalina van de L'Isle miho conoci como Alina. Alina a gradici tur presente y esnan cu a coolabora pa por realisa un soño di dje, esta Dental Wellness cu ta situa na Solito.

   Despues di a termina su studio exitosamente na Hulanda como mondhygienist na Hanze Universiteit na Groningen na 2019 cu su titulo BSc, el a regresa su isla natal. Desde aña 2020 a ofrece su servicio na diferente consultorio dental, e.o. Pre-Care Clinic, H.M. Tromp dental care, N.S. Djoehari, clinica dental di dra Dariela Vega y Van trikt dental.  Sinembargo meta y soño di Alina tabata pa por tin su propio consultorio dental y awor esaki a bira un realidad completo.

   Formando parti di e team tambe ta Karen K. L. Daza Escobar kende a gradua na e Universidad El Bosque na Colombia na 2019 como dentista, y awor ta forma e team di Dental Wellness y ta cla pa brinda Aruba un servicio riba nivel reconoci internacionalmente y avansa. Karen tabata parti di servicio militar na unda el a ofrece su service como dentista y cu un afinidad pa trata mucha y patient cu trauma.

   Aruba por ta orguyoso di un team hoben cu ta consisti di Etta Wever cual ta praktijk manager, Alina, Karen y Sandra Ortiz, ta ganando experiencia tur dia y ta cla y willing pa sigui duna servicio.