Na momento cu guera friu ta rementa den menasa nuclear
- Heredero di Cas Blanco mancha pa e scandal di Watergate
- E gigante den Guera na Medio Oriente ta cuminsa despedi
ORANJESTAD(AAN)- E hecho cu Presidente Jimmy Carter di Merca a dicidi cu e kier despedi di e mundo aki den seno di su famia, no ta bini como un sorpresa pa tur cu ta conoci cu e historia moderno di politica Mericano.
Semper mi a considera como un honor, cu mi por a cera conoci cu tur parti di Merca riba invitacion di State Department di e pais y asina contempla e diferente facetanan di democracia den bida real na uno di e momentonan historico pa e pais y mundo.
Si tin un gobernante mundial, cu a traha den un escenario silencioso, tabata Presidente Jimmy Carter durante uno di e periodonan mas ruidoso di historia Mericano y historia mundial.
Como dirigente di Merca y di mundo, Jimmy Carter mester a confronta e situacion mundial explosivo den cual terorismo a bira palabra diario y miedo pa subi un avion tabata culmina den e cantidad di casonan di secuestro di avionnan.
E Guera na Medio Oriente, e confrontacionnan entre Irak y Iran, tabata parti di e pakete internacional cu historia a entrega na Presidente Jimmy Carter, cu a asumi presidencia di e pais, na momento cu e poder mundial tabata den gara di e escandalo di Watergate den cual Presidente Richard Nixon a skirbi momentonan doloroso pa e pais.
Presidente Gerald Ford tabata e representante di Republicanonan cu mester a enfrenta e Democrat Jimmy Carter di Georgia.
E imagen di Jimmy Carter cu a wordo presenta na mundo tabata di un campesino productor di pinda na Georgia.
Presidente Jimmy Carter nunca a opone su mes contra e imagen di hende humilde, pero mas bien a comporta su mes como hende humilde, mientras mundo tabata confronta e posibilidad grandi cu un guera mundial por rementa na Medio Oriente.
E problemanan entre Irak y Iran. E explosion di di sonido di guera entre Israel y Arabia. E epoca di conflicto na Medio Oriente, mester a haya atencion.
Sin espectaculo, Presidente Jimmy Carter a bira e Presidente carga cu diplimacia cu a percura pa encuentro historico di Camp David, cu mester a evita e explosion mundial na Medio Oriente.
Union Sovietico a conoce su momentonan di derota y mundo a scapa di un guera mundial.
Lamentablemente, na momento cu mundo conoce otro menasa di un guera mundial, si puntra hopi hoben di awe, kende tabata Presidente Jimmy Carter, nan lo tin problema pa contesta.
Jimmy Carter su nomber ta mara na solucionnan na Medio Oriente. E tabata e Presidente cu a kibra e forsa progresivo di Union Sovietico cu finalmente a spart for di otro a base di fayonan Ruso na medio oriente.
Presidente Jimmy Carter a guia mundo na e momentonan mas tenso y a habri porta pa loke lo a bira e fin temporal di guera friu, cu awe ta rementa atrobe na Ukraine.
Na e momento cu Jimmy Carter mester a habri su caminda pa Cas Blanco den eleccion, na Merca mi a papia cu e Mericano na ciudadnan grandi pero tambe aldeanan chikito.
Un anhelo tabata visibel di Noord pa Zuid y di Oeste pa Este. E anhelo pa Merca recobra e imagen cu e tabata tin prome cu Watergate y e fortalesa cu e tabata representa na mundo.
Presidente Jimmy Carter a actua sin busca mucho publicidad. Den tur Presidente di ultimo tempo, e tabata e dirigente cu mas a keda for di “lime light”.
Su sucesor Ronald Reagan a continua cu e trabou cu Jimmy Carter a acepta despues di presidencia di Gerald Ford, cu pa motibo di Watergate a bira e unico Presidente Mericano, cu nunca a wordo eligi.
Su decision pa pasa su ultimo momentonan riba e mundo aki cu su famia, no ta bini como sorpresa.
Awe, den un conflicto mundial, e Presidente Mericano cu semper a busca silencio, ta bolbe bandona publicidad pa na su cas despedi na e mundo, caminda el a nace casi cien aña pasa.
Atras e lo laga e mundo, di cual e tabata dirigente den e silencio mas grandi cu Cas Blanco a conoce!
