Adaptacion na un normal nobo den turismo mester di atencion pa varios factor - Ora pone e Aruba autentico central ta habri porta pa mas actividad comercial - Aruba mester restaura realidad perdi pero tambe prepara pa exigencianan nobo
ORANJESTAD(AAN)- Ta cu hopi atencion DIARIO a sigui e desaroyonan for di momento cu e prome barco di turista cu a bishita Aruba despues di Covid-19, a alcansa nos costa.
Na 2021 no por papia di regreso na turismo ya cu Aruba no por bisa cu na e momentonan aki, e ta bolbe e situacion cu tabata existi prome cu Covid-19 a basha mundo moderno abou.
Pa cuminsa mester realisa bon, cu manera DIARIO a trece dilanti na 2018 y 2019, mundo ta drenta etapanan nobo cu tin exigencia nobo pa turismo cu ya no ta depende di e turistanan cu den e Golden Age despues di guera a percura pa Jet Age yuda turismo cu ta hospeda na un pais, mientras cruceronan a cuminsa alcansa e islanan tropical di Caribe.
Fidel Castro a haci cu turistanan a bandona Cuba y asina Aruba tambe conoce un ventaha na momento cu el a cuminsa cu un maneho dirigi riba turismo.
E turista di ayera no ta e turista di awe. E tipo di turista cu Aruba ta atrae ta propio di e tipo di facilidad cu Aruba ta ofrece y den cual mester tene na bista e atraccionnan cu paisnan cu hopi recurso financiero ta sigui habri y ofrece na e grupo mas selectivo den turismo mundial.
Aruba awe directamente mester pone tur atencion riba dos punto.
Te awor e hospital di Aruba tabata sirbi pa sigura e turista, cu e ta haya bon cuido medico si e tin un problema medico. Den e situacion mundial actual, Aruba mester ta prepara tambe pa actua den caso di cualkier emergencia nobo cu Covid-19 por nifica.
Cu cada persona cu pone pia na tera, tur pais ta mara nan mes na un responsabilidad enfrente e bishitante pero tambe tur cu ta na e pais.
Teniendo cuenta cu e reglanan pa crucero y di paisnan desaroya pero tambe sigur e forma cu Gobierno di Aruba ta keda alerta pa tur desaroyo, nos por hala rosea basta trankil pero atrobe cu e siguransa cu autoridad no ta permiti ningun creacion di riesgonan sumamente grandi cu no ta solemente malesa pero tur resultado cu e situacion mundial actual por tin.
Aruba ta saluda turismo na un momento cu economia ta den recuperacion.
Por bisa cu un tempo nobo ta habri pa turismo pero tambe pa Aruba cu mester habri fuentenan nobo di entrada, cu sigur por haya den turismo, cu ta habri caminda pa cultura di e pais, ofrece entrada directamente pa medio di turismo na bishitantenan.
Pero tin puntonan pa atende.
Pa cuminsa Aruba mester bira Aruba atrobe pa e turista cu mester propaganda na prome luga su cultura, su costumbernan, su platonan, su nombernan di bario, su origen, su desaroyo.
Na e momentonan aki, artesania di Aruba mester hiba e bishitante na e realidad di Aruba como pais y mester habri porta pa e Arubiano bende su productonan sin competencia di loke no ta representa Aruba.
Mester di guianan turistico cu por hiba turistanan na luganan historico. Mester scrap nombernan cu a wordo duna na barionan na Aruba pa asina na momento cu un taxista por ehempel ta hiba un turista hasta pa su hotel, e por papia di su pais, di su historia, di su cultura rico.
Mester debolbe Aruba loke ta di Aruba pa ta sincero. Pasobra ta Arubianismo a trece turismo. Ta “Aruba Dushi Tera” tin e ambiente cu e turista ta busca y cu mester yuda autoridad conserva cu un ambiente cu un moral propio di Aruba tambe.
Na e momento aki tin trabou pa personanan cu kier duna curso na personanan hoben, cu ta interesa den nan pais. Cursonan cu lo duna bida nobo na trabou nobo cu turismo por brinda.
Turismo cu mester carga e Aruba autentico, cu ta loke e turista ta busca. Si e turista kier otro pais, e ta bay e otro pais.
Turismo tin un reto enorme. Turismo tin un responsabilidad grandi. Turismo ta habri portanan grandi pero Aruba mester habri porta pa un generacionnan nobo, cu no ta sigui loke mayornan kier pero si ta entrega Aruba cantidad di oportunidad, cu Aruba mester probecha dor di proteha e alma Arubano cu ta central den turismo pa Aruba!
