Confirmacion cu un aerolinea lo bay cuminza bula entre Aruba y Punta Cana

Ruta nobo pa Aruba for di Rep. Dominicana

ORANJESTAD (AAN): Semper e vuelonan for di Aruba pa Republica Dominicana, tabata dirigi na solamente un ciudad di e pais ey, esta Santo Domingo.  Pa decadanan largo esey tabata e Aeropuerto di entrada y salida pa tur cos di Republica Dominicana pa Aruba.

   Pero den fin di siman a drenta informacion nobo, cu por lo menos un aerolinea regional tin pensa di introduci un ruta nobo di e pais di merengue rumbo pa Aruba.

   Ta e oficialnan di Junta de Aviacion Civil (JAC) di Republica Dominicana mes a anuncia, cu entrante 1 di Juni 2023, aviacion comercial Dominicano lo bay tin ruta nobo cu ta conecta direct cu e ciudad di Punta Cana pa otro paisnan, incluyendo esnan na Europa.

   E entidad aki a ofrece recien un proceso di solicitud di permisonan special di aerolineanan Air Century, Sky High, World 2 Fly, y Neos pa vuelonan comercial den verano, y algun fecha special cu ta atrae pasaheronan.

   Esaki ta cay den e plan tambe di Gobierno Dominicano, pa bin cu un dinamismo mas global y fortalece e conexion aereo, y crea mercadonan nobo, y consolida esnan ya existente.

   Rutanan nobo: E conocido aerolinea ‘Air Century’ cu ya ta bula regularmente pa Aruba, a pidi permiso na JAC pa bin cu 10 vuelo direct y regular for di e Aeropuerto Internacional di Punta Cana.

   Air Century kier bula awor di Punta Cana, direct pa Aruba, tambe Curaçao, tambe St. Maarten, tambe Havana (Cuba).

   Air Century kier bula tambe di Punta Cana direct pa Cartagena (Colombia), San Juan (Puerto Rico), Maracaibo (Venezuela), Valencia (Spaña), Montego Bay (Jamaica), y New York (Merca).

   E comienzo di e vuelonan aki ta programa pa 1 di Juni 2023, y segun e frequencianan pidi pa Air Century, nan lo bay haci 553 vuelo ida y vuelta den avionnan tipo Bombardier CRJ200 cu capacidad di 50 pasahero, y avion Airbus A321 cu capacidad pa 220 pasahero.  Pues nan lo bay ta ofreciendo 243.320 asiento nobo pa e ruta pa Punta Cana.