ORANJESTAD (AAN): Durante un encuentro cu prensa riba Plaza Comercio cu ta na final di Caya Grandi na Playa, e duo conoci como ‘George & Anita’ a anuncia cu nan a caba di lanza un cancion bailable nobo cu e titulo ‘Bodyguard’.
George a indica cu e cancion ‘Bodyguard’ a nace varios aña pasa, ora cu el a cuminza traha y refina e tema musical. Despues di esey el a conoce e cantante Anita, y el a menciona na dje cu e ta trahando pa basta tempo caba riba e cancion nobo aki. El a laga Anita scucha e cancion ‘Bodyguard’.
Asina el a bin cu e idea, pa agrega algun couplet mas den e cancion aki, y traha espacio pa Anita tambe canta cune e cancion ey. Di e forma ey e idea di forma un Duo a nace.
E encuentro aki pa prome biaha a socede dilanti Djiespie’s Place, net na Plaza Comercio. Ey tambe ta unda cu George y Anita a cuminza train e cancion y hacie cada biaha mas perfecto.
Unavez cu nan a keda cla cu e letranan na nan satisfaccion, a busca forma pa aregla e musica mes. E areglista a bira e conocido Ivan Quandus.
Despues cu ora esey a keda cla, e duo George y Anita a graba e cancion den e studio di Ivan Quandus mes.
Segun George, e cancion ‘Bodyguard’ a yega na dje como inspiracion, despues cu el a mira e famoso pelicula ‘The Bodyguard’ di 1992 cu actuacion di e fayecida Whitney Houston y Kevin Costner. E cancion e tempo ey di ‘I Will Always Love You’ di Whitney Houston a bira famoso.
George na su turno a adapta e cancion cu su mesun palabranan, y asina “Bodyguard” a crea fruta. E ritmo di cancion mes ta di merengue, pasobra di comienzo esey tabata deseo di George.
Ya caba e cancion ‘Bodyguard’ por wordo scucha ta toca na emisoranan local, y segun George a declara cu aki dos luna nan lo ta lanzando un otro cancion como duo. E biaha ey e lo bay ta riba ritmo di zouk/cadence.
Pa futuro, George y Anita ta spera di por sigui saca mas cancion, incluyendo uno pa temporada di Pasco.
Anita na su turno ta gradici Dios y ta spera cu Aruba lo sa di acepta e cancion nobo aki. El a bisa cu e experiencia pa crea e cancion y cant’e ta uno inolvidale, y ta gradici tur esnan cu ta apoyando nan.
