Zuhayla Croes di Bureau Sostenemi
ORANJESTAD (AAN): Zuhayla Croes di Bureau Sostenemi a indica den un entrevista cu DIARIO, cu nan a wordo acerca pa Fundacion Respeta Mi pa duna un charla na profesionalnan educacion principalmente, pa elabora riba e trabao di Bureau Sostenemi y presenta e cifranan cu nan tin riba abuso fisico di menornan na Aruba.
Croes a splica cu abuso fisico ta algo cu pasando regularmente ainda y hopi hende ta di pensamento cu e tipo di abuso aki no tin su efecto. Hopi investigacion a mustra cu abuso fisico si tin efecto y ta riba e tema aki mes nan a papia cu e educadornan, pa asina nan por tin un mihor bista riba e muchanan y kico nan por haci y pasonan cu nan por tuma pa asina hunto cu Bureau Sostenemi, proteha e menornan.
Segun e cifranan, casi no tin diferencia den genero, kiermen nan no ta wak un diferente den casonan di abuso fisico entre mucha homber y mucha muher. Pero si, den e efectonan, manera den caso di mucha muher, nan sa bira mas keto y den caso di mucha homber, nan ta bira mas agresivo.
Bureau Sostenemi ta studia tur e tendencianan, tanto positivo como negativo, a pesar cu hopi biaha cierto cambio positivo no ta sosode liher manera nan ta desea, y nan tambe ta ripara e falta di mas concientisacion y prevencion contra abuso fisico. Croes a indica cu e tema aki no ta uno facil y cu den comunidad no ta algo cu hende ta gusta papia riba dje, pero esaki ta keda un tema importante pa discuti entre mayornan, educador y profesionalnan, como e muchanan mes. Muchanan di awendia ta otro cu di antes, segun Croes, den pasado muchanan tabata tolera hopi abuso fisico, pero muchanan di awendia ta hopi mas madura y nan tin mas conocemento di kico ta bon y malo, y hopi biaha nan mes ta expresa kico nan no ta gusta, como mayor ta importante pa sa con pa deal cu esey.
