Manera DIARIO a adverti for di 2020 a bira realidad pa Aruba tambe - *Forsa di compra ta baha den un comunidad internacional instabil - *Pandemia ta crea un circulo comercial negativo cu mester di maneho
ORANJESTAD (AAN) — Manera DIARIO a base di investigacion guia pa expertonan internacional y local a indica for di inicio di e pandemia Covid-19 na 2020, siman pasa na Aruba oficialmente a wordo presenta como realidad nobo.
E pais ta parti di un mundo di cambio despues cu Covid-19 a destrui e desaroyonan di Siglo 20, den cual economia mundial despues di Segundo Guera Mundial a drenta un epoca nobo.
Aruba tambe a desaroya como un pais di consumo, cu un nivel di bida halto cu a permiti un crecemento comercial local.
Aruba a enfrenta varios crisis local cu e pais por a supera adaptando su mes na posibilidadnan internacional mas prometedor.
Den e caso di Covid-19, henter mundo a wordo ataca dor di un malesa cu a paralisa produccion, transportacion mundial y tur loke ta necesario pa un circulo comercial internacional.
Continuamente DIARIO a adverti pa scarcedad grandi cu tabata tin riba tur tereno ora e factor mas importante den economia, cu ta hende, a wordo afecta dor di Covid-19.
Aunke mundo riba tereno di tecnologia a conoce un desaroyo sumamente importante, hende a keda central den tur loke ta parti di comercio local y internacional.
Produccion di articulonan a wordo directamente influencia dor di e malesa, cu a afecta transportacion di productonan pero na mes momento a baha e forsa di compra mundial.
Perdida enorme di entrada a wordo registra den tur loke ta necesario pa un bon ciclo comercial.
Na Aruba, Gobierno Wever-Croes a tuma medidanan necesario pa a evita e paralisis total di comercio dor di duna empresanan asistencia financiero pa asina evita cu nan mester a cera nan porta y manda nan personal cas.
Cada persona cu perde trabou ta un cliente menos den e sistema comercial y cada empresa cu mester cera su porta ta otro perdida den e cadena total di economia.
Insiguridad ta sigui manifesta su mes mientras mundo no domina e pandemia, cu den olanan ta ataca mientras hende ta adapta su mes.
Sinembargo, e normalidad conoci prome cu e pandemia no ta existi actualmente y tur pais mester busca formulanan nobo pa sigui dilanti.
Informantenan clave a mustra cu mientras ta recupera economia cu actividad economico, mester yega tambe na concensonan nobo entre gobiernonan y gremionan pa por sigui dilanti.
Manera informantenan a indica, mundo for di despues di Segundo Guera Mundial a gasta placa, pone y tene placa den circulacion. Circumstancianan social nobo a sostene e economia nobo cu a surgi pero cu Covid-19 a basha abou sin duna hende oportunidad pa prepara su mes.
Actualmente por mira cu riba tur tereno mundo ta trata di tene cabez riba awa y ta scapa loke por scapa cu hasta perdida. Eventonan grandi ta tuma luga pero sin publico, cu ta crea ganashi.
Sinembargo, Covid-19 ta exigi cambionan basico di structuranan conoci pa evita colapso economico.
“E exito economico di Siglo 20 tabata e circulacion di placa cu Covid-19 a interumpi. Na Aruba Gobierno Wever-Croes a permiti placa sigui lora. Factornan exterior ta sigui bati na porta, manera presenta door di comercio siman pasa,” a bini dilanti.
Prijsnan ta sigui subi. Ora prijs subi, publico cumprado mester adapta su mes y ta cumpra menos ya cu placa lo alcansa pa menos.
Spiralnan peligroso ta wordo forma na e momentonan aki rond mundo.
“Na 2020 Aruba no a conoce e temporada di turismo productivo. Actualmente Aruba ta dilanti e final di 2021 cu mester a bira e temporada di actividad comercial na e pais. Aumento di costonan internacional cu lo aumenta costo local, ta presenta retonan nobo na tur pais y na Aruba tambe,” informantenan a indica
DIARIO den su proximo edicionnan lo sigui dedica atencion na e topico aki, cu for di momento di entrada di Covid-19, a wordo presenta na Aruba como uno di e problemanan grandi cu mundo mester enfrenta y cu ta decisivo pa e nivel di bida di hende na Aruba y rond mundo cu ainda no conoce e contenido real di e normal nobo cu sigur lo afecta e custumbernan di e mundo di consumo, cu a nace y desaroya despues di Segundo Guera mundial.
