Ni ley ta permiti creacion debe personal manera a pasa cu debe nacional - *Covid-19 a exigi Gobierno Wever-Croes conduci Aruba na normalidad - *Pandemia mundial a yuda e abuso di debe nacional y PPS bandona orbita
ORANJESTAD (AAN) — Uno di e miho noticianan cu por a alcansa Aruba na e momentonan aki tabata, cu Prome Ministro Wever-Croes a logra yega na un acuerdo cu Hulanda pa loke ta trata supervision financiero.
Pa hubila e hecho cu Hulanda lo sigui supervisa e maneho financiero di Aruba, nos mester a analisa loke a hiba Aruba na supervision di Hulanda, cu tabata tambe final di e autonomia financiero di Aruba for di 2015.
Pakico Hulanda mester a actua? Pakico e palabra “supervision” a bira parti di e idioma gubernamental di Aruba?
E motibo ta masha simpel. Pasobra abuso a wordo haci di placa di e Pueblo di Aruba.
Pa yega na e conclusion aki, nos mester a puntra nos mes si Gobierno Mike Eman mester a gasta placa for di su saco, e lo a haci esaki manera el a haci cu placa di Aruba.
Cifranan ta condena Gobierno Mike Eman y ta sigui tene Gobierno Mike Eman responsabel pa un parti grandi di e medidanan cu Aruba mester tuma y placa cu Arubianonan mester pone riba mesa pa paga nan debe, cu ta unico logro di Gobierno Mike Eman.
Awe den un situacion di pandemia Aruba mester paga pa loke ningun hende responsabel lo a haci, cu ta hinca su mes den un debe di e forma cu a pasa cu Aruba.
Ni Ley ta permiti un instancia acepta un prestamo cu un persona pa henter su entrada. Esaki a pasa cu Aruba cu despues di un dozijn di aña finalmente mester yega na un solucion concreto cu Hulanda.
For di 2009 cu Mike Eman a haya poder pa maneha placa di Pueblo, el a abusa di confiansa di Pueblo.
Hulanda a interveni ora debe di Aruba den man di Mike Eman a bira casi loke Aruba tabata tin na entrada. No mester lubida cu ora debe normal no tabata suficiente, Mike Eman a bini cu es proyectonan PPS pa hunto cu Benny Sevinger gasta 1.6 Miljard.
For di 2017 e prome tarea di Gobierno Evelyn Wever-Croes tabata, pa busca un solucion pa e desaster financiero cu Mike Eman a laga atras hunto cu su pakete di un proyecto Citgo fracasa.
Hunto cu Hulanda a busca un solucion pa Aruba, cu segun Mike Eman lo a conoce un crecemento economico cu 15 porciento pero cu Mike Eman a laga atras cu un debe di casi 100 porciento di entrada di e pais, cu ta estado di bancarota pa cualkier persona of empresa.
Ora Covid-19 a bati na porta e debe nacional a pasa 100 porciento di entrada di Aruba bancarota cu tur resultado cu esaki tin pa futuro generacionnan.
E hecho cu Prome Ministro Evelyn Wever-Croes a yega na un acuerdo cu Hulanda pa supervision Hulandes, ta di aplaudi. Pasobra awor Aruba y Hulanda por pone Aruba den un rumbo nobo den un maneho financiero sano.
E situacion cu e pandemia Covid-19 ainda ta provoca, ta exigi pa e pais tin un gobernacion y un maneho responsabel cu lo percura pa un dia Aruba ta un pais realmente autonomo y no un pais caminda gobierno mester bay sconde den Fort Zoutman ora Hulanda bati na porta.
For di 2010 Aruba ta un pais pober. Un pais manca dor di mal gobernacion di Mike Eman cu Gobierno Wever-Croes mester a scapa di ultra tumba.
Awe despues di un dozijn di aña, gobernantenan responsabel mester percura pa Aruba tin un futuro di prosperidad pa un generacion nobo.
E acuerdonan cu Evelyn Wever-Croes a logra cu Hulanda den cual e cooperacion pa yega na un miho Aruba ta seya, ta habri porta pa un futuro responsabel!
