Comite Olimpico Arubano a tene un Asamblea Extraordinario

*A trata puntonan presupuesto 2025 y statutonan, ademas di tin algun sorpresa

ORANJESTAD (AAN):  Diasabra ultimo na Hyatt Place, Comite Olimpico Arubano (COA) a tene un Asamblea Extraordinario unda a trata dos punto di agenda hopi importante. Den prome luga, a trata e presupuesto di aña 2025, unda a splica den detaye tur entrega y gasto cu COA tin.

            Asina ta ilustra na tur federacion miembro di COA den un manera transparente e maneho financiero di COA.

            Siguiente punto cu a trata ta e statutonan di COA, cu a ser actualisa despues di 21 aña. A logra incorpora e cambionan necesario a base di “wetboek 2”, unda den 2021 a formalisa tur cos relata na “privaatrechtelijke rechtspersoonsvormen”. Esaki ta un punto sumamente importante cu tur otro asociacion na Aruba, incluyendo tur federacion deportivo miembro di COA mester adapta dentro di nan statutonan.

            Despues di a trata e dos puntonan formal di agenda, a tene un momento hopi special, unda a honra dos miembro di COA . Den e caso aki a gradici Seever Krozendijk pa su 18 aña di compromiso cu COA, unda e la percura pa crea contenido di tur cos COA pa asina comnparti cu pueblo di Aruba.

            Banda di esaki, a nombra un miembro Honorario di COA, e prome den historia, cu a keda na honor di Jesus Leon “Chu” Halabi. Sigur un persona hopi conoci den e mundo di deporte y cu a aporta casi 40 aña di su tempo na deporte y na Comite Olimpico na Aruba.