ORANJESTAD (AAN): Riba 15 di april 2010 fundacion CINEARUBA a keda funda pa cineasta Juan Francisco Pardo.
Diescinco aña despues fundacion CINEARUBA a logra realisa diferente proyectonan for di peliculanan cortico pa pelicula largo, un mini series y un serie di proyectonan creativo enfocando riba desaroyo di talente manera un club di actuacion hubenil, tayernan di actuacion di voz, musica y audiovisual. E fundacion a realisa tayernan cu scolnan y den barionan. Actual CINEARUBA ta dunando les di musica na e muchanan y hobennan na YMCA Dakota y San Nicolas, esaki ta un proyecto di cuatro aña cu lo finalisa na 2026.
Desde 2017 presentacionnan di peliculanan ta forma gran parti di e programa di e fundacion. Awendia e fundacion ta organisa Playa Film Festival, cual ta celebrando su di cinco edicion e aña aki. Playa Film Festival lo tuma luga na prome fin di siman di october for di 3 pa 5 di october na Caribbean Cinemas. Pa prome biaha e festival lo ta den salanan di cine y cu un tapijd cora pa asina hunto cu e publico celebra su di cinco aniversario y e di diescinco aniversario di fundacion CINEARUBA.
E interes internacional pa participa na Playa Film Festival ta grandi y na e momento aki tin peliculanan di Merca, Francia, Poland, Hulanda, India, Grecia, Alemania, Brazil, Turkia, Serbia, Mexico, Republica di Korea, Spaña, Corsou, China, Sint Maarten, Rusia, Romania, Portugal, Peru, Republica di Moldova, Moroccco, Hungray, Croatia, Inglatera, Finlandia, Estonia, Republica Dominicana, Colombia, Switzerland, Australia y Austria.
Pa haci e celebracion special Playa Film Festival lo tin un premio cash pa e miho pelicula local. Registracion di pelicula pa consideracion ta via filmfreeway.com/playafilmfestival y e ta gratis. Peliculanan cu ta cumpli cu tur reglanan lo sigui pa e fase di seleccion.
E reglanan ta describi riba e pagina di registracion. Den e fase di seleccion un comite lo haci un seleccion oficial di e peliculanan cu lo bay competi na e festival. Loke ta haci un pelicula atractivo pa seleccion ta principalmente e storia, e urgencia di e storia, e topico y e duracion di e pelicula. Pa e categoria local ta enfoca riba primicianan mundial, peliculanan cu pa prome biaha lo wordo mira pa un publico na e festival.
