Comision fiho di labor den Parlamento a pidi reunion cu Minister Glenbert Croes

Parlamentario Marco Berlis (MEP): --- *Pa splica e programa “Aruba kier Traha”

ORANJESTAD (AAN): Aruba ta pasando den un momento severo di crisis economico, specialmente awor cu FASE y loonsubsidie ta bay caba, pasobra e pais no por carga esaki mas. Esaki sigur lo afecta e 2700 personanan cu ainda ta riba FASE, pero mas ainda e empresanan cu tabata wordo yuda door cu gobierno tabata paga y sostene un grupo di miles di persona, cu tabata traha y tabata ricibi e loonsubsidie. Den e cuadro aki, ami como voorzitter di e Comision Fiho di Labor, a yama un reunion riba diamars merdia na Parlamento cu minister Glenbert Croes pa splica nos mas riba su plan di “Aruba kier traha”.

            E reunion tabata uno bastante productivo. Sra. Sabine de Groot cu ta e persona encarga pa ehecuta e plan aki a duna un presentacion structura na nos comision. Den esaki el a toca hopi punto importante pa Parlamento sa con e plan aki ta hinca den otro. Un di esakinan ta cu lo usa e database di FASE pa incorpora esaki den esun di “Aruba Kier Traha,” pasobra e personanan aki ta e prome grupo di persona cu lo wordo afecta ora cu lo stop FASE. Ademas di e grupo aki lo bay concentra tambe riba e grupo cu a ricibi loonsubsidie, pasobra e realidad ta cu gobierno no sa ainda cuanto hende lo bay cas ora loonsubsidie stop fin di luna.

            E ultimo biaha cu loon subsidie y FASE lo wordo paga ta entre 5-10 di December 2021. Door di e decision aki, e posibilidad ta cu empresanan lo cuminsa laga hende bay, pasobra nan no lo por tene nan na pia di trabao sin e loonsubsidie. E speransa ta sinembargo, cu high season ta dilanti di porta y cu esaki ta trece e posibilidad cu lo bay tin mester di un bon cantidad di hendenan pa traha den e sector turistico, den diferente area.

            Ta pesey minister Glenbert Croes lo traha un MB y hunto cu e ekipo di “Aruba Kier Traha” lo sinta cu tur e stakeholdersnan manera DAO, DPL, Censo y otro organisacionnan y instancianan cu ta activo den e sector laboral pa coordina y traha hunto di un forma dinamico pa yuda den e plan aki. Di e forma aki Gobierno por asisti nos pais y esnan sin trabao den e momentonan dificil cu nos ta experienciando.

            E ta importante pa nos para keto na e hecho cu na banda cu gobierno ta haciendo su maximo esfuerso pa yuda conecta esnan cu mester cu un trabao, e ta keda e responsabilidad di cada un di nos pa haci nos best pa busca y tuma un trabao. Laga nos tin un mentalidad positivo, y pensa riba nos famia prome. Kisas e trabao cu bo lo haya no lo ta loke bo ta experiencia den dje. Lo importante den e temporada aki ta pa tuma un trabao pa sigui pone pan riba mesa y cubri e necesidad y gastonan basico. E ta pa e motibo aki tambe cu “Aruba Kier Traha” lo bin cu entrenamientonan pa capacita y empodera esnan sin trabao cu diferente curso, pa asina yudanan integra y transiciona den un trabao nobo pa nan. Esaki lo haci nos forsa laboral multi-facetico, y mas capas di logra haya un empleo nobo. Nos pueblo a yega di pasa den hopi crisis desde nos Status Aparte, y nos a demostra di ta un pueblo resiliente cu no ta baha cabes dilanti di e crisis ni e tormentanan.

            E pandemia y crisis aki tambe lo ta temporal. Pesey ban lanta cabes y uni forsa pa asina hunto nos hiba nos pais padilanti y agilisa e recuperacion economico di nos pais.