ORANJESTAD (AAN): E comerciante Eddie Daou cu e.o. tabata un di e co-propietarionan di empresa DOWCO,
pero cu hopi hende tabata considera un di e gran expertonan di mundo di Baseball, a fayece riba Diaranson.
Fouad Antonio Daou mihor conoci como Eddie, a nace dia 2 di Juni 1940 na Curaçao, pues tin 83 aña di edad. Na comienzo di decada di 1980, Eddie cu su rumannan a bin establece nan mes na Aruba, y e tempo ey a tuma over e exitoso empresa di Wongco cu tabatin sucursal na Oranjestad y San Nicolas. Na 1986 e ruman Gabriel cu tabata accionista mayoritario a fayece, y su viuda a dicidi keda cu Wongco cu tabata casi na final di Nassaustraat. E otro tres rumannan, incluyendo Eddie, e ora a dicidi keda encarga cu e sucursal di Wongco cu tabatin den Bernhardstraat na San Nicolas, y despues dicidi cambia e empresa na San Nicolas su nomber na Dowco, y a sigui ofrece mesun bon servicio.
E empresa a draai basta bon, te cu Dowco a keda opera na San Nicolas, fuera a habri sucursal den Columbusstraat na Playa tambe cu a bira un gran hit. E tabata e lugar cu varios club deportivo tabata acudi pa imprimi T-shirt rapidamente usando heat-transfer di letternan.
Dowco despues a habri lugar den area di Macuarima na Santa Cruz, y a traha nan mesun edificio na Cura Cabay. Despues a bende edificio na Cura Cabay, y Eddie a keda cu esun na Macuarima. Ultimo tempo esaki ta bao maneho di su yiu muher.
Ademas di cuminsa opera den e negoshi aki, Eddie a haci uso di su voz di naracion y experticio den mundo di Baseball, pa yuda e emisora Radio 1270 AM cu transmision di weganan di Baseball cu den e epoca ey tabata grandi na Aruba. Esnan cu tur anochi no por a bay mira weganan grandi di e.o. Santa Cruz Rockies, of Marlboso, of e team di Aruba Video Center hunga, tabata scucha Eddie Daou y su crew ta haci naracion na forma sin igual via e emisora aki.
Ademas e tabata haci tin biaha transmision tambe di futbol, pero su pasion principal ta Baseball. Y Eddie semper tabatin un persona mas pa yuda haci naracion, pero despues Eddie a yega di demostra cu e por facilmente haci e transmision solitario, y pa esaki el a haya hopi admiracion. Varios hende ta hasta comenta cu ta Eddie Daou e tempo aya a haci Baseball Double-A bira uno asina grandi cu fanaticonan yen tur anochi den Stadion.
Eddie mes ta bibando pa hopi tempo na Paradera, y semper durante temporada di Aña Nobo ta tur hende por a mira e bunita espectaculo di vuurwerk cu e ta pone apenas algun minuut prome cu aña cambia, y tabata algo admirable pa tur bisiña den e area.
E biaha aki na cambio di aña 2023 pa 2024, hopi habitante a haya falta di e vuurwerk show di Eddie, y ta e ora ey nan a bin haya sa cu e personahe stima aki ta sufriendo y ta batayando malesa. Un malesa cu casi no tabata lage sali mas fo’i cas. Ultimo biaha cu a mire, ta ora el a sali pa bay despedi pa entiero di su ruman Sannin.
Eddie sin duda ta un gran baluarte pa mundo di Baseball na Aruba. Fuera di esey, e tabata un ser humano cu semper tin conseho pa tur hende, y e ta adverti bo di antemano cu e ta skerpi cu su opinion, pero esey ta loke a pone bira un homber respeta.
Na su famia, amigonan, coleganan, y tur fanatico, DIARIO ta expresa su mas profundo palabra di condolencia.
