Nan tabata riba e boto cu na December a sali rumbo pa Aruba
ORANJESTAD (AAN): Informacion for di estado Falcon na Venezuela, ta indica cu famia di e nuebe residentenan aya cu a desaparece dia 9 di December, ora nan a subi un lancha cu a trata na yuda nan drenta ilegalmente riba teritorio di Aruba awor mas cu nunca ta furioso riba nan autoridadnan local.
Ta bay bira 3 luna caba cu e famia ta activamente buscando yudansa di tur instancia pa por localisa of haya sa sikiera algo di nan sernan keri cu tabata riba e boto, pero cu nunca a yega Aruba, y no a tende nada mas di nan.
Pero awor na Februari 2024, nan a reacciona cu sentimento mixto, ora cu a bira conoci cu a localisa e lancha cu e nomber ‘La Rogui’ cu un cadaver abordo, te na e isla di San Andres na Colombia. E isla aki ta situa como 1.250 km west di Aruba, casi cerca di costa di Nicaragua.
E famia aki na numeroso ocasion a acudi na Ministerio Publico di estado Falcon, cu ta esnan cu a tuma nota na December di e hendenan perdi. Pero hamas a ricibi contesta satisfactorio. Nan a hasta pidi pa manda un carta pa Colombia pa asina pidi nan yudansa den e investigacion tambe. Pero esey nunca a wordo haci.
Prensa na Venezuela a entrevista Elisa Vargas, kende ta mama di Juan José Hurtado, kende ta un di e hombernan cu a subi e boto pa sali rumbo pa Aruba. Ministerio Publico a bisa nan cu nan tin contact directo cu investigadornan na Colombia riba e asunto.
Sinembargo ora cu e famia mes a papia direct cu autoridadnan Colombiano cu ta atende e caso di e boto haya na Isla San Andres, a bin realiza cu e investigacion ta wanta, debi cu Venezuela a haci ningun esfuerso pa comunica cu autoridadnan Colombiano pa por haya mas detaye di e investigacionnan.
“Colombia mes a haci testnan di DNA, y nos no mester a ni paga pa esey. Ya nan a investiga loke nan por, pero ta parce cu Gobierno di Venezuela no tin ningun interes pa resolve e caso aki,” el a declara.
A mustra cu como un luna pasa nan a bay pidi pa manda un carta pa Colombia riba e asunto, pero ainda autoridadan hudicial na Venezuela no a haci nada.
“Nos ta sinti cu autoridadnan local ta gañando nos, pasobra nos ta bay Ministerio Publico y nan ta bisa cu Si, nan tin comunicacion cu Colombia. Nos ta yama Colombia, y nan ta bisa nos cu nan ta wardando riba Venezuela.”
Famianan di estado Falcon tabatin contacto cu Richard Martínez, kende ta representante legal di e Mision Archipiélago di San Andres, kende a splica nan cu Ministerio Publico na Colombia ya a haci su trabao, pues inspeccion di e cadaver y tur e investigacion cu mester haci segun leynan Colombiano. Tambe nan a manda varios carta y detaye pa Venezuela, pero te ainda no a haya ni un solo contesta riba nan.
No tabatin forma di verifica e informacion, pues na Colombia nan no por informa comunidad mes oficialmente, y suministra resultado di testnan di DNA pa confirma si e cadaver haya den e boto ta coresponde na un di esnan desapareci. Resultado lo wordo duna solamente na Ministerio Publico of na famia directo.
Mama di Juan Hurtado ta pidi autoridadnan na Venezuela pa acelera e proceso pa sikiera trata na identifica e persona cu a wordo haya den e boto. “Esaki ta demostra e falta di interes di parti Venezuela, pues Ministerio Publico no a manda nada pa sa na ken e cadaver ta pertenece. Ta parce cu Colombia mes tin mas interes pa resolve e caso compara cu autoridad Venezolano mes.
