Diasabra awo 2 di Maart
ORANJESTAD (AAN) – Diasabra 2 di Maart, Fundacion Kidneys 297 conhuntamente cu 2Fast 4 U, ta bay organiza un caminata cu nan ta dedic’e na Kidneys 297, pasobra nan kier sigui concientiza riba cuido di riñon.
Asina Muluska Sneek di Fundacion Kidneys 297, a duna di conoce na DIARIO. E caminata aki lo tuma lugar na Bushiri Karting, y esaki ta e di cuater edicion cu 2Fast4 U ta haci, cual a cuminza pa e muchanan mas chikito, y cu a sigui expande pa hende grandi. “Nos muchanan lo haci uso di e pista paden, pa seguridad, y e cinco kilometer ta pa adulto na parti pafo. Esaki ta un estimulo den e deporte cu ta hopi gusta na Aruba, cu ta caminata”, Miluska a menciona.
Pa e muchanan tin diferente categoria y pa adultonan ta 5 kilometer pafo, rond di e edificio, el a reitera.
Miluska a expresa cu e fundacion ta hopi gradici cu e comunidad di Aruba, cu a duna nan e apoyo masal, pasobra nan ta sold out.
El a agrega cu aunke Fundacion Kidneys 297 ta un organisacion chikito, nan ta traha cu hopi biaha den colaboracion cu diferente organizacion manera Hospital, nan ta duna charlanan, tambe pa organizacionnan priva cu ta pidi e fundacion esaki. E fundacion ta hopi contento cu organizacionnan a cuminza traha na prevencion durante nan siman di salud, y ya acerca fundacionnan pa nan bin duna informacion. Esaki ta haci cu riba facebook nan semper ta keda activo, nan ta keda concientiza door di traha conhuntamente cu otro organizacionnan.
